GIKLARO ni San Fernando Mayor Lakambini “Neneth” Reluya nga di ang festival sa kapistahan sa patron sa Barangay Panadtaran nga si San Vicente Ferrer ang hinungdan sa nasinati nga kahuot sa dagan sa trapiko sa ilang lungsod niadtong Lunes sa gabii.
Siya nipasabot nga tungod sa kagagmay sa mga karsada sa ilang lungsod diin daghang mga sakyanan ang naghugop nga gikan namakasyon sa habagatang bahin sa Sugbo ug silingan nga lalawigan sa Negros Oriental sa Pasko ug Bag-ong Tuig, ang nakaingon sa pagkabara sa dagan sa trapiko.
Matod niya nakatampo usab sa trapiko ang mga sakyanan nga nag-counter flow ug wa na mosubay sa insakto nga lane.
“Dungan sila unya di ma-accommodate sa among main roads ang mga sakyanan kay two lanes ra baya mi. Dili mi four lanes pareho sa Naga, pareho sa Carcar nga wide kaayo ang ilaha. So, expected ang bottleneck is ang San Fernando,” dugang pagpasabot ni Reluya sa pakighinabi sa Superbalita Cebu.
Ang mayor niangkon nga nakatampo ang kapistahan sa Barangay Panadtaron apan dali siya niklaro nga di kini ang nag-una nga hinungdan sa kahuot sa dagan sa trapiko.
Si Reluya namulong nga kadyot lang ang parada diin kutob lang sa alas 6:00 sa gabii ang kalihokan apan ang trapik kay niabot og pasado alas 10 sa gabii.
Tinguha nila nga magbutang og billboards sa nag-unang mga karsada sa lungsod isip pasidaan sa mga drayber nga likayan ang mag-counter flow aron di mosamot kahuot ang dagan sa trapiko.