SA labing unang hi­gayon, posible nga mo­apil ang mga contestant sa Ms. Universe 2017 sa ipahigayon nga grand parade sa Sinulog 2017 sa dakbayan sa Sugbo karong Enero 15.

Si Ricky Ballesteros, executive director sa Sinulog Foundation Incorporated (SFI) nagkanayon nga nakadawat siya og report apan di pa kumpirmado nga moapil ang labing menos walo ka mga contestant gikan sa lainglaing nasod nga mga kandidata sa Ms Universe.

Apan giklaro sa executive director sa SFI nga hangtod sa pagsuwat ning balita, wa pa makaparehistro ang organizer diin giingong mosakay sila sa float nga gipaluyohan sa usa sa sponsor sa labing dako nga kalihukan sa indigay sa kaanyag.

Wa usab siya masayod kon unsa nga mga nasod ang moapil.

Samtang gibutyag ni Ballesteros nga mangabot na sunod semana ang mga out of town contingent nga maoy usa sa mga giatangan sa matag Sinulog.

Kini gilangkuban sa Catbalogan sa Samar, Dumaguete sa Negros Island Region, Lanao del Norte ug Tangub City diin sila ipahiluna sa mga billeting center nga kanhi ilang giokupahan sama sa City Central School, Abellana National School, Labangon Elementary School ug Zapatera Elementary School.

Matod ni Ballesteros nga upat ra ang ilang gipadad-an o imbetasyon ug pulos kini nisanong.

Ang ubang mga lungsod ug siyudad wa moapil hayan tungod pag-ilis og bag-ong lokal nga opisyal.

Apan sa gihapon angay atngan sa katawhan mao ang Sinulog sa Kabataan sa lalawigan ug dakbayan nga maoy maghatag og dugang kadasig sa grandiyusong kalihukan sa siyudad.

Sa gihapon ang SFI nagkanayon nga ilang tumanon ang gusto ni Mayor Tomas Osmeña kinsa maoy chairman sa SFI nga mahuman ang parada alas 4:30 sa hapon ug ablihan dayon ang mga karsada nga gitak-opan para makaagi ang mga sakyanan.