MONTEVISTA, Comval Province - Patay ang retiradong magtutudlo human nabanggaan didto sa Purok 4A, Barangay San Jose, alas 6:30 sa gabii, Biyernes, Disyembre 30.

Ang namatay giila nga mao si Panfilo Maniwang Sr., 72, nagpuyo sa Purok 4A, Barangay San Jose, Montevista.

Segun sa imbestigasyon sa Traffic Section sa Montevista Municipal Police Station, ang nakabangga sa biktima mao ang Mitsubishi Lancer, kolor brown, dunay plate number nga LCU 552, gipanag-iya sa Stanfilco Division sa Dole Philippines Inc., ug gimaneho ni Richie Palomata, 35, nagpuyo sa Tagum City.

Gidason sa taho sa kapulisan nga ang sakyanan gikan sa Agusan del Sur ug paingon sa Tagum City.

Apan pag-abot sa nahisgutang lugar, aksidenteng nabangaan ang biktima kinsa mitabok lamang sa dalan.

Nahiagom sa mga samad ug bun-og sa nagkadaiyang bahin sa lawas ang biktima ug dali kining gidala ngadto sa Davao Regional Medical Center sa Apokon, Tagum City.

Apan ang nagtabang nga doktor nagdeklara nga patay na ang biktima.

Ang sakyanan nga nalambigit, lakip na ang drayber, gikustodiya sa Montevista Municipal Police Station samtang nagpadayon ang imbestigasyon.