DEAR Dr. Fritz,

Maayong adlaw kanimo ug sa tanan nga nagatamod ning imong kolum diri sa SuperBalita.

Dok, nisulat gayud ako kanimo mahitungod ning akong problema sa akong panit nga nadaot sa init sa adlaw. Nalibog gayud ko, dok, kay nagagamit man unta ko og sunblock, pero, daut man gihapon ang akong panit. Lain baya tan-awon.

Unsa man ang akong angay nga buhaton, dok?

Palihug tambagi ako. Daghang salamat ug magpaabot ko sa imong tubag.

Mikee of Sasa

*****

Dear Mikee of Sasa,

Nakasabot ko sa imong sitwasiyon tungod kay maskin unsaon pa nimo kamaayo og gamit sa mga sunblock, daw imposible gihapon nga dili ka maigo sa kadaot sa init sa adlaw inig gawas nimo sa inyong panimalay.

Ug tungod kay ang init sa adlaw mao ang hinungdan sa kasagaran nga pag-edad sa panit, dako ang kahigayonan nga imo kining pagabayaran diha sa mga kunot sa imong nawong, mga puntik-puntik nga brown og panit nga naglaylay.

Apan ayaw og kabalaka tungod kay ang kadaot sa init sa adlaw dili mao ang motapos sa imong paglaum sa perpekto nga pamanit. Dugang pa nga kon mas maguol ka, mas dako ang kahigayonan nga mas matiguwang ka tan-awon na hinuon.

Mao nga ngisi lang, cool ka lang aron dili madugangan ang kunot sa imong nawong ug kahuot sa imong dughan.

Mao nga alang kanimo, Mikee, ania ang mga remedyo nga mamahimo nimo nga masulayan aron makab-ot nimo ang pamanit nga maayo ang kadan-ag.

1. Ayaw ug kalimot sa sunblock.

Nakahibawo ko nga nagagamit ka na og sunblock. Apan ang pangutana, unsa nga klase ang sunblock nga imong gigamit. Kon anaa lang sa SPF 15 nga kasagaran mao ang akong nakit-an karon sa merkado, nan, daw susama lang gihapon na sa way epek, ilabi na sa klase sa kainit sa adlaw karon. Pilia gayud ang sunblock nga adunay SPF 30 nga adunay label nga “broad spectrum.”

Kini nagpasabot nga mobantay kini batok sa mga init sa adlaw nga maoy hinungdan sa mga kunot sa nawong ug mga puntik-puntik nga brown. Gamita kini kada adlaw aron matagaan ang imong panit og panahon nga makaalim ug sa imong resistensya sa lawas nga mo-repair sa kadaut nga ginama sa init sa adlaw.

Apan tungod kay taas-taas pa man ang atong pagahisgutan mahitungod niining imong sitwasiyon, tugoti ako nga ato kini nga padayunon og pagtuki sa sunod nga edisyon niining atong patik.

Hangtod sa sunod!

Dr. Fritz

(Si Dr. Fritz Legarde Espedilla usa ka aesthetic dermatologist/surgeon ug clinical sexologist. Aduna usab siyay kahibalo ug training sa hypnotherapy ug sa Medical Acupuncture. Usa usab siya ka personalidad sa radyo nga sobra na sa dekada nga nagadagan sa kahanginan ug autor sa iyang libro nga “Healthy is Sexy Secrets ni Dr. Fritz”. Nagatudlo usab siya sa usa ka kolehiyo sa Pharmacy. Alang sa inyong mga sulat-suliran, mamahimo kini ninyong ipadala sa Dear Dr. Fritz, c/o Sunstar-Davao Publishing Inc., Ebro-Pelayo Building, Jacinto St., Davao City, (former Department of Foreign Affairs office), across Ateneo de Davao University and beside Holy Child School of Davao, o i-e-mail kini sa dokfritz@yahoo.com. Ang dili magpamantala dili matubag!)