ILIGAN CITY -- Patay na nga nakit-an ang lawas sa 13 anyos nga adunay dinunggaban niadtong Sabado, Disyembre 31, sa usa ka creek sa Sitio Limunsudan sa Barangay Rogongon ning dakbayan.
Naila ang biktima nga si Wennie Dadao Dalayao, grade 5 pupil, residente sa nasangpit nga lugar.
Aduna kini samad-dinunggaban sa iyang too nga dughan nga milahos sa likod sa bata nga maoy gituohang hinungdan sa iyang kamatayon.
Sa inisyal nga report sa Iligan City Police Station 3, mibiya ang biktima sa ilang pinuy-anan alas 11 kapin sa buntag niadtong adlawa aron tagboon ang iyang 16 anyos nga igsoon kinsa gikan sa ilang umahan.
Apan alas 3:30 sa pagkahapon, ang ilang silingan nga nailang si Ricky Sabas Tadaman ang mi-report ngadto sa pamilya sa biktima nga nakit-an niya ang patay'ng lawas niini sa may kasagbotang bahin.
Sa pagkakaron, gilubong na ang biktima apan ang kapulisan wala pay gipagawas sa media nga impormasyon kung aduna na sila'y lead aron maila ang suspek ug masuta ang motibo sa krimen.