BOLUNTARYONG mitahan sa managlahing buhatan ilabi na sa National Bureau of Investigation (NBI) ug Camp Evangelista ang duha ka mga suspek sa pagpusil ug pangdunggab sa usa ka lalaki atol sa party pagtagbo sa Bag-ong Tuig.

Naila ang mga suspek nga sila si Dodong Villega kinsa mitahan sa tinugyanan sa NBI samtang si Den Peleciano, alyas Dogoy, ang mitahan usab sa Camp Evangelista.

Sa nahipos nga impormasiyon gikan sa Police Station 4, nasayran nga boluntaryong mitahan ang duha sa managlahing buhatan apan nagpaabot pa kini sila tungod kay wala pa sa ilang opisina ang maong mga suspek.

Nasayran nga kalit lamang nga gisulong sa mga suspek si Earl Balaba, 36, adunay kaipon, samtang nag-party kini pagsugat sa Bag-ong Tuig.

Gipusil ug gidunggab ang biktima hinungdan sa kamatayon niini.

Nasayran nga si Dogoy ang midunggab ni Balaba samtang gipusil usab kini ni Dodong sa wala’y igo nga rason.

Sa pagkakaron, ang mga suspek ang anaa na sa mga nahisgutang buhatan samtang ang patay nga lawas sa biktima ang gihaya diha sa Somo Funeral Homes ning dakbayan.