NIDAUG si National Master Rustum Tolentino batok kang Johnnel Balquin, 3.5-0.5, sa ilang race-to-three nga Eric Fuentes-sponsored Chess match nga nahuman niadtong Dominggo sa Capitol Chess Park.

Gikan sa 2-0 nga standing niadtong Sabado aron usa nalang ka punto ang kinahanglanon, napugngan ni Tolentino ang posibleng balos ni Balquin.

Matod ni Balquin, wala niya nakit-an ang labaw sa ikatulo nga round diin nisurprisa siya paggamit og Modern Benoni Defense batok kang Tolentino.

Apan igo lang nahuman sa tabla diin wala gigamit ni Balquin iyang paborito nga King's Indian nga napilde sa unang round.

Sa ikaupat nga round, nasikaran ni Tolentino si Balquin sa ilang kombati sa French Defense susama sa ikaduha nga round.

"Namugos ko kay must-win man. Pero lesson to learn," ingon ni Balquin.

Niuli si Tolentino sa P3,000 nga ganti sa match.

Bag-o lamang, nipakurat si Balquin sa iyang katakos didto sa Surigao Open human niya nabugha sila si Grandmaster Richard Bitoon sa Cebu ug International Master Oliver Dimakiling sa Davao.