KIDAPAWAN CITY (Updated) -- Unom ang patay, tulo ang naangol, 158 ang nakapuga, ug siyam na ka priso ang nasikop pag-usab human gisulong sa dul-an 100 ka mga armadong tawo ang North Cotabato District Jail sa Barangay Amas sa dakbayan, ala-1 sa kadlawon Miyerkules, Enero 4.
“Limang inmates ang namatay at pang-anim ang member ng BJMP (Bureau of Jail Management and Penology). At may sugatang inmates at isang sibilyan na nasa hospital ngayon,” suma ni Police Chief Inspector Joyce Birrey, Public Information Officer sa North Cotabato Provincial Police Office, dihang gihinabi sa SunStar Davao SuperBalita pinaagi sa telepono niadtong Miyerkules.
Si Birrey nag-ila sa mga namatay nga sila Jail Officer 1 Excell Ray Vicedo ug mga prisong Joey Aranas, Allan Jay Tolentino, Edfel Bautista Liscano, Rapacon Dimawan Ambolonto, ug Adonis Ray Ferraren Cedeno, pulos dunay kasong illegal drugs.
Naangol mao ang mieskapo nga si Peter John Ararao, Johnmeir Selgas, ug sibilyan nga si Sorelo Quino.
“Sa ngayon, ang nakatakas ay umabot ng 158 inmates at siyam naman ang nahuli ulit,” dugang ni Birrey.
Mga nasikop pag-usab mao sila Jason Angkanan dunay kasong illegal drugs, Wennie Curimo Rota dunay kasong frustrated murder, Faisal Tiburon dunay kasong robbery, Joselito Tomines dunay kasong illegal drugs, Jerome Oguit dunay kasong rape, Melvin Antipuesto Canete, Richel Vales Flores, Joreste Robles Perdido, ug Ruta Coremo.
Sa naunang pakighinabi kang North Cotabato District Jail Warden Superintendent Peter Bungat, siya nagsulti nga dungan sa makusog nga ulan ug brownout, giatake ang prisohan sa wala mailhing mga armadong lalaki ug gipabuthan ang mga jailguards hinungdan sa nahitabong pinusilay.
Nakahimo, sumala pa, sa pag-abri ang mga armado sa mga selda sa mga priso hinungdan sa pagpuga sa 132.
Daling miresponde ang hiniusang puwersa sa militar ug kapulisan ug giabagan ang mga jailguards.
Tungod sa kadaghan sa mga armado nga gituohang mga sakop sa Bangsamoro Islamic Freedom Fighters, gipabuthan sa mga sundalo kini og 105 mm Howitzers Cannon, hinungdan nga miatras paingon sa hilit nga dapit sa Kidapawan City.
Sa pagkakaron, padayon ang paglutos sa militar, kapulisan ug mga sakop sa BJMP ngadto sa mga armadong grupo ug mga priso nga mipuga.