IGO ang usa ka mata sa sekyu human gipusil sa wala maila nga suspetsado niadtong Domingo alas 10:00 sa gabii sa Mindanao International Container Terminal (MCT) Services, Inc., Phividec Compound, Tagoloan Misamis Oriental.
Ang biktima naila nga si Drandreb Salongga, ulitawo, sekyu sa MCT ilalom sa BIDA Security Agency kinsa lumulupyo sa Maramag Bukidnon.
Subay sa report sa Northern Mindanao Medical Center (NMMC), nag-duty ang biktima diin kini gipusil sa suspetsado.
Wala magtuo ang biktima sa kalit nga panghitabo tungod kay wala man kini silay panagbingkil.
Nakaangkon ang biktima og samad pinusilan sa wala nga mata hinungdan nga anaa kini sa talandugon nga kahimtang sa dihang gidala sa balay tambalanan ning siyudad.
Adunay taho nga usa ka empleyado sa gobiyerno ang suspetsado kinsa pabilin pa nga gawasnon hangtod karong mga panahona.
Ang biktima nagpabilin pa nga anaa sa NMMC alang sa operasiyon human giingong wala pa makuha ang bala diha sa mata niini.