Vivencio Tabasa
364 Katipunan St., Cebu City
TSIKBOY si Jessy tungod sa iyang kaambong nga matawag sa pinulongang Iningles nga ‘tall, dark and handsome.’ Apan nasungo ang pagka tsikboy ni Jessy dihang naabtan og siyam-siyam ang iyang paninguha kang Jenny nga maoy labing maanyag nga babaye sa ilang baryo Buslot.
“Bay Jess, iyarok ning tunga sa basong bino nga way sagol aron maundang nang imong siging dribol nga wa gyud ka ka-3 points sa kasingkasing ni Jenny!” ni Godie nga kahubugon nga nakapahugyaw sa ilang barkadang nag-inom sa tindahan ni Manoy Froilan nga nagsugod sayo sa udto.
“Niay maayo, ay. De kotse man diay imong karibal, Bay Jess. Atong abangan ang karomata de kabaw ni Ingko Birot aron atong paatbangan og parking ang.ilang kotse,” sagbat ni Toring nga gadigwa-digwa nga nakamugnag sipang suliyaw nga nakadugang sa kaalegre sa grupo. Sa wa pa magbuwagbuwag ang grupo mga alas singko sa hapon may gihunghong si Pete kang Jessy nga nakapatingkag sa dughan niini ug daw nakapahuwas sa iyang kahubog.
Pagka sunod adlaw sayong miadto si Jessy sa ilang Pete nga naabtan niyang nag-inom og kape. “Lingkod, Bay Jess,” agda ni Pete nga mitunol og tasa sa higala.
Samtang si Jessy nagkutaw sa iyang kape, mapahiyumon kining mikidhat kang Pete ug misulti, “Belib ko sa ka-epektibo sa pormula nga imong gihatag kagabii, Bay Pete!”
“Ang buot mong ipasabot nga gisugot ka na ni Jenny?” ni Pete nga miiknat ang kilay.
“Oo, Bay Pete. Tungod sa imong pormulang ‘hilupak’ kun hilak, luhod ug pakiluoy nga maoy nakahagtos sa matig-ang balatian ni Jenny.”
“Daan pa kong nakamatikod nga may pagtingin siya nimo. Galing lang nagpadiki-diki tungod sa imong ka-tsikboy ug pagka sugarol,” ni Pete nga mikagiki pagkatawa.
“Sugot lagi, Bay, pero gidid-an ko pag-sigarilyo, inom og bino,ug di na ko paduolon sa tigbakay ug buwangan nga maoy akong kalipay. Ug ang labing pait, Bay, kay ‘no kiss, no touch’ una mi suds a unom ka buwan!” ni Jessy nga mingislo ang nawong.
“Bay Jess, mag-selebrar ang grupo karong gabii nga sa katapusan naangkon na gyud nimo ang kasingkasing ni Jenny. Adto sa ilang Bay Erning ta magtapok,” ni Pete.
“Bay Pete, ma-late ko kay adtuon ko pa si Mr. Frank Kwan nga mohatag og advance sa abang sa akong bakiki nga iyang i-apil sa P5M derby karong Dominggo,” ni Jessy.
“Ok ra, Bay, kay ikaw goy bida sa okasyon,” ni Pete.
HAPIT na alas utso sa gabii dihang miabot si Jessy sa ilang Erning nga maoy nag-andam sa salo-salo. Nakugang siya dihang nakita si Jenny didto.
“Bay Pete, nganong dia si Jenny?” ni Jessy.
“Akong giimbitar kay ato gong silingan. Gani mihatag siyag duha ka manok nga iyang gipakuha nilang Boy Enrile ug Ben Traviero.”
“Unsa, nihatag si Jenny og manok?”
“Oo, Bay. Hibawo bitaw ka nga way nahot atong grupo.”
Human sa gamayng kumbira mapahiyumong nangutana si Jessy kang Jenny, “Jen, diin ka kapalit adtong manok nga bus-ok og unod nga maayo sab pagkaluto ni Forting ang adubo nga kagubkob kaayo?” Naghapyod-hapyod siya sa iyang tiyan sa kabusog.
“Gilamian ka, Jess, sa adubo?” ni Jenny. “Pwerting lamia, uy!” ni Jessy.
“Aw, lagi. Abi nakog wa ka lamii sa imong buyugon ug bakiki nga gilat-an ug giadubo!” matod ni Jenny nga maoy nakapahugyaw sa barkada.
“Unsaaa?” singgaak ni Jessy nga nakurat. Mihilak siya ug mikalit paggakos kang Jessy ug gimudmod ang iyang simod sa ugdong dughan ni Jenny. Nakalitan si Jenny nga mikaging ug misiga ang mga mata sa gibuhat ni Jessy nga nakamugnag sipang suliyaw ug bahakhak sa grupo. (Katapusan)