Editoryal: Jail warden imbestigahon

KON tinuod man gani ning gisulti ni Jerkin Oralde, sakop sa napatay nga drug lord sa Duljo nga si Jeffrey Diaz, dakong tamparus kini sa atong mga kadagkuan sa Bureau of Jail Management and Peno­logy (BJMP) 7 nga gipangulohan ni Chief Supt. Allan Iral kinsa nagtamod sa seryusong kampanya batok sa illegal drugs.

Si Oralde, 24, nakuhaan og binultong shabu atol sa buy bust operation sa kapulisan sa Mambaling Police Station niadtong Lunes sa gabii sa Sityo Plastican, Barangay Duljo-Fatima, Cebu City.

Sa imbestigasyon sa kapulisan nga gipangulohan ni PS/Insp. Eduard Sanchez, gitug-an ni Oralde nga ang shabu nga iyang gipayuhot gikan ra sab diay sa Cebu City Jail diin usa ka binilanggo ang padayon nga nagpadagan sa illegal nga negusyo.

Dako kining sukwahi sa pasalig ni City Jail Warden Supt. Jessie Calumpag nga maoy nipuli ni Supt. Johnson Calub kinsa girelibohan niadtong Agusto sa miaging tuig human madiskobrehi ang mga shabu nga mibalor og minilyon ka pesos sud sa City Jail.

Nanaad si Calumpag nga iyang usbon ug korehian ang mga pamaagi sa City Jail aron mahatagan kunohay og kasulbaran ang problema kalabot sa drugas sulod sa prisohan, pero ambot og iya ba kining natuman.

Angay ipaubos sa imbestigasyon ni Chief Supt. Iral kini si Calumpag kon unsa ka tinuod kining gipangtug-an ni Oralde kay basin og nagmata lang siya og buntag niini.

Mas maayo sab siguro nga mopahigayon og subsob apan kinalit-kalit nga pag-inspection o pagronda ang BMJP sa City Jail diin makig-ayuda usab sila sa taga Philippine Drug Enforcement Agency (PDEA) aron gyud hingpit nga makab-ot ang ang paglimpyo sa maong bilanggoan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph