Si Cagayan de Oro City Mayor Oscar Moreno mihangyo ngadto sa mga motorista nga unta tas-an ang pasensya sa dagan sa trapiko tungod sa pagtukod sa Bitan-ag Bridge diha sa dalan CM Recto ning dakbayan.

Mipasabot si Moreno nga kung matapos ang maong bridge dako man usab og matabang diha sa kahapsay sa kadalanan.

Gilaomang mo-abot pa sa unom ka bulan ang pagtrabaho niini apan karon pa lang pipila na ka mga motorista ang mireklamo sa kahuot sa dagan sa trapiko.

Pipila ka mga driver sa dyip nga mag-agian sa dapit mitiyabaw nga nakapalangan kini pag-ayo sa ilang pagpasada tungod kay daw aduna'y mga higayon nga wala'y makabantay nga traffic enforcer ug gakaguliyang ang dapit.

Nanawagan usab si Moreno sa Department of Public Works and Highways (DPWH) nga unta paspasan ang ilang trabaho niini.

Mahinumduman gisirado ang tunga sa dalan CM Recto human gisugdan ang gitukod nga Bitan-ag Bridge niaging bulan ug dungan niini gipatuman ang rerouting.(SVB)