NAGKASINABOT na ang NLEX Road Warriors management ug ang higanteng Fil-Tongan nga si Asi Taulava.

Dili pa lang dugay, si Taulava mihangyo sa management nga i-trade siya sa laing team human mius-os ang iyang playing time ubos sa sestima sa bag-ong coach sa team nga si Yeng Guiao.

Nagkanayon si Guiao nga andam niyang buhian ang kanhi MVP.

Apan gipasabot ni Guiao nga dili siya mohimo og lakang hangtod nga dili pa niya ikasulti sa personal si Taulava.

Sa miaging adlaw, naghugpong sila si Guiao, Taulava ug team manager Ronald Dularte aron sulbaron ang isyu.

Gipasabot ni Dularte nga migamay ang playing time sa 43 anyos nga si Taulava gumikan kay gikan kini sa pagkaangol ug wala pa kini hingpit nga naalim.

“Basically, that’s his frustration. He wants to contribute more to the team, but he cannot because he’s not yet recovered 100 percent from his previous injuries,” matod ni Dualrte.

“He just wants to be 100 percent in shape and try to help our team more.”

Nidugang si Dularte nga mipasalig si Taulava human sa panaghugpong nga magpabilin siya sa team.