Overnight parking, trabaho sa dan problema: BFP

GIREKOMENDAR ni Mandaue City Fire Marshal Josephus Alburo ngadto ni Mayor Luigi Quisumbing nga estriktuhon ang pagdili sa overnight parking sa mga sakyanan sa mga gagmayng dalan sa dakbayan.

Si Alburo nagkanayon nga ang pagpasagad og parking sa mga sakyanan usa sa dakong nakatampo nga naglisod ang mga bombero sa pagsud sa mga sitio sa Maguikay ug Guizo atol sa pag-ulbo sa sunog niadtong Enero 1.

Niatubang mismo si Alburo nila ni Quisumbing,  Bise- mayor Carlo Fortuna ug mga opisyal sa Bantay Mandaue ug City Disaster Risk Reduction and Management (CDRRMO) atol sa briefing sa panghitabo sa kasaulugan sa Bag-ong Tuig diin tulo ka mga dagkong sunog ang girespondihan sa Bureau of Fire Protection (BFP) sa dakbayan.

Mga problema

Pito ka mga dagkong problema ang gipadayag ni Alburo sa mga opisyal sa Dakbayan nga ilang nasugatan sa sunog nga nakaapektar sa sobra sa 500 ka pamilya ug nikaon sa sobra 200 ka mga panimalay sa Sitio Sto. Niño, Guizo  ug Sitio Salvacion, Maguikay.

Gawas sa pagpataka og parking sa mga sakyanan tibuok gabii, gibasol usab ni Alburo ang nagpadayon nga pagtrabaho sa mga dalan nga nakababag sa ilang mga agianan.

Laing problema nga nasugatan sa mga bombero mao ang kakuwang sa access roads paingon sa nasunugan, kakuwang og fire sub station sa dapit, kakuwang sa ekipo sa BFP sama sa forcible entry apparatus ug self- contained breathing apparatus, ug dugay nga pagputol sa Visayan Electric Company (Veco) contractor lineman sa linya sa kuryente.

Atol sa briefing, nihatag og rekomendasyon si Alburo sa mga opisyal sa dakbayan aron mapalambo unya nila ang pagtubag ug alarma sa sunod.

Si Fortuna sa laing bahin nagkanayon nga adunay ordinansa ang Mandaue kalabot sa overnight parking ug kini misaad nga striktuhon ang implementasyon niini.