MOPAHIGAYON og special session ang Cebu City Council human ilang nadawat ang suwat hangyo ni Mayor Tomas Osmeña aron mahatagan og temporaryong kasulbaran ang problema sa basura.

Kini ang gibutyag ni Bise Mayor Edgardo Labella, presiding officer sa Konseho, human nipadayag ang mayor nga mopatawag siya og session sa miaging adlaw human napupos ang kontrata sa Jomara Konstruckt Corporation (JKCO).

Si Labella nagkanayon nga subay sa Local Government Code of 1991 kun Republic Act 7160, ang chief executive adunay gahom sa pagpatawag og session sa Konseho.

Ang gusto ni Osmeña kagahapon unta ipahigayon apan si Labella nagkanayon nga adunay mga konsehal nga aduna pay giatiman sa gawas sa dakbayan sa Sugbo gumikan usab sa nanglabay nga holiday.

Hinungdan nga sa alas 10:00 sa buntag sa Biyernes, magtapok ang tanang mga konsehal sa Team Rama ug Bando Osmeña Pundok Kauswagan (BOPK) aron hisgutan ang solusyon sa basura hilabi na nga nagsingabot ang kapistahan ni Snr. Sto. Niño.

Sa iyang bahin, si Osmeña nagkanayon nga way problema kaniya ang maong adlaw nga gitagana ni Labella ug iyang napanglantawan nga aduna unyay hanoy nga pagtuki sa mga sakop sa Knseho.

Ang mayor nagkanayon nga dili siya gusto og canvassing inay buot niyang ipatuman ang public bidding aron way kurapsyon nga mahitabo.

Apan sa pagkakaron di sila makapahigayon og bidding gumikan kay mosubay pa kini og taas nga proseso apan iyang gipadayag nga kini na maoy katapusang canvassing.