Safety sa mga gambalay
ANG nahitabong sunog sa Zone-3 Barangay Carmen niadtong Huwebes sa kaadlawon diin mikalas sa kinabuhi sa usa ka mabdos ug sa 5 anyos nga anak niini maoy panghitabo nga kapugngan unta kon wala pay pagpabaya ang gobiyerno.
Unsa may kaakohan sa gobiyerno?
Dili ba responsibilidad man unta sa gobiyerno ang pagseguro sa kaluwasan sa komunidad?
Apan, bisan atong suhiron ang tibuok bahin sa siyudad, daghang mga balay o gambalay – pribado man o publiko, pang-commercial o ordinaryong puy-anan, ang dili gyud pasado kon dunay himuong safety inspection.
Basi sa report, nagsugod ang kalayo sa silingan nila ni Mary Jane Paderanga, ug dihang mikaylap kini sa atubangan nga bahin sa ilang balay wa na sila makagawas.
Daghan pang mahitabo nga susama niini hangtod nga walay himuong kausaban atong gobiyerno.
Makadungog tag balita nga gihingusgan sa gobiyerno, pinaagi sa Bureau of Fire Protection ug sa City Office of Building Official, ang kampaniya batok sa mga gambalay nga dili luwas kon ugaling dunay kalamidad o trahedya sama sa sunog.
Apan, samtang ingon niini ang kalihukan sa gobiyerno, nia pa gihapon kining mga isyu sa safety sa mga balay ug building.
Masabtan nato ang kadako sa hagit nga giatubang sa gobiyerno pagpatuman sa ilang programa tungod sa kakuwang nila og ekipo ug mga personnel.
Kon moabag lang pud unta ang matag barangay, tingali kaminusan ang trabaho sa OBO ug BFP.
Maaninaw nako kon unsa kagubot kon ipatuman gyud sa hingpit kining balaod pagseguro sa kaluwasan sa mga molupyo.
Kon dunay inspection nga himuon sa tanang balay, segurado mosobra sa 90 porsiento ang dili pasado.
Kumusta man pud kaha ang mga commercial nga gambalay, labi na kining mga dormitory ug mga pabrika?
Alang kanako, mas mahimong epektibo baya ang kampaniya sa safety kon kita mismo – mga tag-iya o operator og mga building, una sa tanan, mosubay sa kodego sa pagtukod og mga gambalay.
Apan kon magpaabot pa kita nga badlongon sa gobiyerno tungod kay salikwaot ang desinyo sa atong gambalay, basi baya dili pa kita makahimo og koreksiyon sa mga depekto nalamoy na sa kalayo ang atong kabtangan.