GITAKDANG pasakaan na og kaso niadtong Miyerkules, Enero 4, ang drayber sa ambulansya nga nakaligis-patay sa sundalo niadtong Martes sa buntag diha sa Barangay Puerto, dakbayan sa Cagayan de Oro.
Kasong Reckless Imprudence Resulting to Homicide ang atubangon sa suspetsado nga nailang si Arlan Cupal, 40 nga taga Zone 2, Jasaan, Misamis Oriental.
Sa pakighinabi sa SunStar SuperBalita ngadto na kay Police Station 6 Chief Ian Borinaga sa Puerto giklaro niini nga si Cupal matod pa ang nakabangga niini sigon sa nakasaksi samtang boluntaryo usab nga mitahan sa ilang buhatan ang maong drayber.
“Aw dili to tinuod naa ma’y witness nga siya gyud ang naka-side swipe, pasakaan na nato siya og kaso, Reckless Imprudence Resulting to Homicide, naa siya karon sa atong custody kay ni voluntary surrender man siya gahapon, gihatod sa daw niya iyang pasyente,” pahayag ni Borinaga.
Nasayran nga grabe ang naangkon nga samad sa ulo sa biktima nga si PFC Victor Gabutero human matod pa nga nalatayan gayud ang ulo niini.
Giingong mi-overtake ang ambulansya sa Bugo liner apan nakurat na lamang sa dihang adunay nadunggan nga lagapak ug nakita pa diha sa side mirror nga mikaliring ang biktima uban sa iyang motorsiklo apan wala na lang kini mihunong tungod kay aduna pa kini gihatod nga pasyente nga gitabang usab.
Sa pagkakaron, ang maong suspetsado ang nagtingkagol na sa mini-cell sa Police Station 6 sa Puerto.