NASIKOP sa tinugyanan sa kapolisan sa Police Station 1 sa Divisoria ang suspetsado nga giingong tigpayuhot sa ginadili nga droga niadtong Martes, Enero 3, alas 11 sa gabii sa JR Borja/Osmeña Street, dakbayan sa Cagayan de Oro.

Ang maong dinakpan naila nga si Mark Anthony Pabonita, 33, minyo ug residente sa Sto. Niño, Barangay Lapasan ning dakbayan.

Sa nahipos nga impormasyon gikan sa tinugyanan sa kapolisan gikabutyag nga nagpahigayon og drug bust ang Police Station 1 hinungdan nga nasikop si Pabonita.

Narekober gikan sa posisyon sa suspek ang lima ka mga pakete sa gitoohang shabu diin adunay gimbug-aton nga tulo ka gramo ug gibanabanang kantidad nga mokabat sa P22 mil.

“Naa man gu’y report nga kini siyang nadakpan nato karon maoy tigpayuhot sa droga sa maong bar… sa illegal nga droga sa shabu dako kaayo ang posibilidad nga siya’y ga-supply sa sulod sa maong bar,” matod ni Police Station 1 Investigator Allan Radaza.

Sa pagkakaron, ang maong suspetsado ang nagtingkagol na sa Maharlika Detention Cell alang sa pagpaabot sa tukmang kaso.