ANG showbiz couple nga sila Richard Gutierrez ug Sarah Lahbati ang gikuhang endorser sa upat ka establistamento dinhi sa dakbayan sa Davao.

Recently, gihimo ang contract signing sa maong kaugdahan sa Hilltop View sa D' Leonor Inland Resort sa Brgy. Communal Buhangin ning siyudad sa Davao.

Uban sa couple ang inahan ni Richard, ang talent manager nga si Annabelle Rama.

Sila Richard ug Sarah maoy napili nga moendorso sa D' Leonor Inland Resort and Adventure Park, usa ka park nga 40 ektarya ang gilapdon ug nagbukas sa publiko Mayo 2011.

Sila sab ang magsilbing nawong sa D' Leonor Hotel sa Bajada, D' Japanese Tunnel Family Resort and Restaurant sa may Hill Street Subdivision, Balusong Extension, Matina, ug Emars Hotel Restaurant and Beach Resort sa may Times Beach, tanan dinhi sa dakbayan sa Davao.

“It's our first time na mag-endorse ng ganito and we are excited about it,” ni Sarah.

Dugang ni Mercy Lim, anak sa nanag-iya sa resort nga napili nila sila Sarah ug Richard tungod di lamang sila sikat nga artista apan tungod sila usa ka maayong couple ug ginikanan sa anak nilang si Zion.

“Kahit di pa sila kasal, makikita mo naman sa kanila na they are loving and good parents. Gusto kasi namin ma-project 'yung four establishments natin like the D' Leonor Inland Resort as a place na pangpamilya. So perfect talaga sila (Richard and Sarah) as endorsers,” ni Lim.

Malaumon sab si Lim nga ang pagkuha sa couple magsilbi nga sinugdanan sa good partnership nila.

Mapasalamaton sab si Annabelle Rama sa pagsalig ug pagkuha sa serbisyo sa iyang mga anak.

Nauna nang namahayag si Leonora Lim, nga haligi sa upat ka kompanya, nga kaniadto nangandoy lamang siya sa pagtukod og gamay nga hotel nga may restaurant ug gamay nga pool.

Apan sulti niya nga sa paglabay sa panahon midako ang iyang pangandoy.

“Dreams are limitless,” suma niya.

Samtang, gidugang ni Mercy nga luyo sa endorsement nila Sarah ug Richard sa resort ug hotel nila, plano sab nilang iapil sunod ang anak niining si Zion.

Gidugang sab niini nga kuhaon sab nila si Sarah nga mahimong endorser sa pipila ka beauty products nga ilahang ipaila-ila sa merkado.

Ang D' Leonor Inland Resort and Advanture Park, D' Leonor Hotel, Japanese Tunnel ug Emars Inn and Beach Resort anaa ilawom sa LDL Reality Incorporated ug RDL Pharmaceutical nga gipanag-iyahan ni Madam Leonora.

Sa kasamtangan, gisugdan na ang photoshoot alang sa print ug billboard ads nila Sarah ug Richard nga gilaumang moguwa karon nga tuig.