LAIN na usang tuig ang atong latason ug tungod niini dako kaayo ang atong pagpasalamat sa Labaw'ng Kahitas-an tungod kay nakasugakod kita sa milabay nga tuig 2016, nakatikang kita ning tuig 2017.
Niining tuiga nato, total nga mamatikdan ang kausaban nga dugay na natong gi-ampo nga mahitabo sa Pilipinas.
Ubos sa bag-ong administrasyon ni Pangulong Rodrigo Duterte, atong namatikdan nga duna usay dakong pagbag-o sa lokal nga pangagamhanan.
Ilang giduyugan kon unsay mga maanindot nga programa ilabina sa gubat batok droga ug kriminalidad.
Posibleng magmalampuson ang kawsa sa atong Pangulo, apan nagduhaduha ko nga masumpo ang korapsiyon ilabina kay naa pay lider sa silong paingon ngadto sa grassroot level ang wala pa gihapoy kausaban kay wala pa man kita makapili ug bag-ong lider nga sama sa liderato sa atong kasamtangang lider partikular dinhi sa dakbayan sa Dabaw.
Sa han-ay sa nasyunal, medyo naglisod pa ron pagpuli ang administrasyong Duterte sa mga alipores sa milabay nga administrasyon kay mora ni'g mga butiki nga mipilit sa ilang pwesto bisan og gipahawa na.
Liwat kaayo sa ilang mga amo sa yellowtards nga dili modawat og kapildihan, nagpabaga gihapon og nawong bisan og gihinginlan na sa ilang mga pwesto.
Sama usab ni Senator Leila de Lima nga bisan og bokya na, hirit pa gihapon.
Karong tuiga, budget na sa Pangulong Duterte ang gamiton ug hulata nga duna pay laing mas deadly pa nga mga kausaban ang atong paabuton nga maoy makapa-usab sa atong panlantaw sa kinabuhing Pilipino.
Sundon ug respetuhon lamang nato ang mga kausaban nga sa atong huna-huna dili madawat, apan sa hinay-hinay mosulod na sa atong sistema ug makaingon kita nga nindot diay kaayo ang plano sa atong Pangulo.