GISUBHAN og dautang hitabo ang Bag-ong Tuig sa probinsiya sa North Cotabato.

Kini human nga gisulong og mga armadong mga lalaki ang North Cotabato District Jail nga nahimutang sa Barangay Amas sa dakbayan sa Kidapawan kagahapon sa kaadlawon.

Ang pagpanulong miresulta sa pagkakalas sa kinabuhi sa usa ka jail warden samtang laing kauban niini naangol usab.

Samtang kapin usa ka gatus ka mga priso nakahigayon og puga samtang mga jailwarden ug mga armadong grupo nagbinakbakay.

Hinuon duna nay nadakpan sa hiniusang puwersa sa kapulisan ug militar nga mga pugante sa padayon nga paglutos kanila.

Samtang laing lima nila ka mga kauban, napatay sab sa subsob nga operasyon sa mga awtoridad.

Apil sa operasyon sa mga awtoridad ang mga armadong grupo nga misulong sa prisohan.

Sayud kita nga kadaghan na gisulong o giatake ang district jail sa probinsiya kon diin napriso ang mga giingong high profile nga kriminal. Sa maong mga higayon, nakapuga sab ang pipila ka high profile nga priso.

Apan taliwala sa maong hitabo, mora og wala man lang gihimong konkretong aksiyon ang Bureau of Jail Management and Penology (BJMP)-Soccsksargen ug ang Philippine National Police sa kinatibuk-an, aron nga lig-unon pa ang pagpatuman sa seguridad sa maong prisohan?

Napamatud-an kini sa hitabo mismo karon nga subli na sab nga gisulong ang prisohan ug mas daghan pang priso ang nakapuga.

Unta ang maong hitabo, igo na aron nga makapahigmata sa atong mga mga opisyal sa BJMP-Soccsksargen nga dugangan pa ang mga jailwarden sa prisohan ug tugotan na nga ang ubang mga high profile nga naa karon dinha mabalhin na ngadto sa kaulohan.

Pinaagi niini, di na mahimong target sa mga kaaway sa gobyerno ang prisohan aron nga luwason ang ilang mga kaubanan nga naa napriso sa lugar.