Dear Noy Kulas,
Ang akong problema mao ang akong uyab nga ako nang gibuwagan kay manapat. Ang problema kay iya kong gihulga nga kon di siya makigbalik, siya maghikog.
Nagpatabang siya sa akong amiga, apan ingon niya nga mas maayong buwagan na lang nako og dayon ang akong uyab.
Lahi ang akong uyab kay bisan tambagan pa sa pamilya, di siya maminaw. Iyang tumanon ang iyang gustong buhaton. Unya unsaon man nga wa na man koy love niya.
Please tambagi ko.
ANNE
Anne,
Lisod kaayo kon pasumban ang ingon niana nga lalake. Daghan na bitaw ang nagpatambag nako anang klaseha sa tawo. Manghulga nga maghikog kon buwagan o di balikan.
Naay uban nga gawas nga naa ini nga sakit, mangulata pa gyud.
Years ago naa koy nailhan nga babaye nga kulatado sa iyang uyab. Kanunay siyang makigbuwag apan di mosugot ang lalake nga grabe kaseloso. Nahibung ko nganong nagpabilin siya sa relasyon nga wa na siyay kalipay. Sa akong pagsusi, mao diay nga naglisod siya tungod kay gihulga gihapon sa lalake nga siya maghikog bisan klaro siyang nag-antos. Dapatan siya bisan dunay daghang mga tawo. Pakauwawan pa kon magkalisod.
Sama sa uban nga sama nimo og problema, moingon kong ayaw pabilanggo sa tawo nga mokuha sa imong kalipay ug kagawasan. Di ka angay mabalaka sa iyang hulga nga maghikog tungod kay iya na kanang desisyon kon iyang buhaton. Nahibawo na man kaha ang iyang pamilya nianang problemaha? Sila ang angay nga mohimo og aksyon, di ikaw. Kon ingon ana na man lang diay, kadaghan sa mga tawo nga mag-antos sa relasyon nga wa nay gugma ug kalipay, apan di makalingkawas kay manghadlok ang partner og hikog. Pagkapait baya kon huna-hunaon.
NOY KULAS
(Alang sa imong problema, e-mail sa kulassuper@sunstar.com.ph ug rojval69@yahoo.com)