AKONG napanid-an nga adunay dag­hang mga establisamento nga wala motuman sa balaud alang sa mga senior citizen.

Kadaghanan kanila dili mogahin og expresslane nga magamit sa mga senior citizen aron dili sila mahasul sa paglinya uban sa mga batan-on. Daghan usab ang dili mohatag og discount nga alang sa mga senior kon mopalit silag tambal ug ubang kompra.

Angay usab hinuong masayran sa mga senior nga mahatagan lang sila sa gimbut-ang discount alang kanila kon anaa silay resita sa doctor ug naghupot usab sila og purchase booklet nga giisyu sa Office of the Senior Citizens Affairs (OSCA). Mao usab ang sa pagpalit sa mga supermarket. Nagkinahanglan usab ang senior sa booklet aron sila maka-discount og parte sa ilang bayranan.

Apan hangtud karon wa pa ko makadungog nga adunay mga tindahan nga nasilutan tungod sa wa pagtuman sa balaud alang sa mga senior citizen. Hinaut pa nga hugtan na kini pagtuman sa atong gobiyerno ug sa OSCA sugod karong tuiga.

wa sad matuman

Laing balaud nga wa matuman mao kining anti-medicancy law kon balaud batok sa mga makililimos. Ang maong balaud nagdili sa pagpakilimos ug sa paghatag og limos ni bisan kinsa.

Atong makita sa kadalanan ang mga makililimos, kadaghanan mga bata, nga mosakay sa mga public uti­lity jeepneys (PUJ). Ang uban kanila magpaaron-ingong manaygon unya diay manulis sa mga pasahero.

Dili maayong mopasar og balaud ang gobiyerno nga dili nila mapatuman. Duha lang kini sa daghang mga ordinansa o balaud nga wa gayud matarong og patuman sa gobiyerno.

Si Candidate Duterte ug si President Duterte

Lahi na gayud ang panglantaw sa usa ka kandidato itandi sa dihang mapili na siya sa pwesto.

Mao kini ang nahitabo sa mga presidente kaniadto. Sa kandidato pa si Corazon Aquino iyang gisaad nga hunongon ang tanang klase sa sugal, apil ang gipasiugdahan sa gobiyerno sama sa casino. Apan nagpadayon ang casino hangtud natapus ang iyang termino.

Sa iyang bahin, gisaad ni candidate Duterte nga iyang ipatuman ang gipasar sa Kongreso nga P2,000 nga umento sa pension sa mga Social Security System (SSS) pensioner. Ang iya tingaling gibasihan mao ang gipasar sa mga kongresista ug senador nga balaudnon nga nagbuot sa maong umento nga gi-veto ni Presidente Noynoy Aquino.

Karon nga presidente na siya, iyang nakita ang tinuod nga sitwasyon sa SSS pinaagi usab sa iyang mga economic advisers. Nangita na karon si Presidente Duterte sa iyang giingon nga win-win solution sa maong problema.

Mao usab ang iyang gisaad nga dublihon ang swelduhan sa mga sakop sa Philippine National Police (PNP) ug sa Armed Forces of the Philippines (AFP). Sumala ni Budget Secretary Benjamin Diokno nga di pa kini mahatag karong tuiga.

Ako nagtuo nga tininuod ang katuyoan sa presidente sa pagtabang sa maong mga tawo apan nag­lisud pa lang gayud karon sa pundo ang atong gobiyerno. (msr1144@yahoo.com)