HUMAN matribukar ang sindikato sa pagpayuhot og illegal drugs sa New Bilibid Prisons sa Muntinglupa diin atoa didto nabilanggo ang mga dagkong konbiktadong druglords ug ingon man pag-take over sa Philippine National Police Special Action Force (PNP/SAF) sa security, abi ba nako og nahunong na ang pagpayuhot sa illegal nga drugas gikan sa national penitentiary. Apan wala pa man diay. Kon atong tuhuan kining pamahayag sa nadakpan nga mga drug personalities dinhi sa Sugbo, sila nagkanayon nga ang drugas nga ilang gipamaligya dinhi didto gihapon nila gi-angkat sa mga druglords nga nabilanggo sa Munti.
Sa paglingkod ni Presidente Rodrigo Duterte niadtong Hulyo, natribukar nga ang tinubdan sa illegal nga drugas mao ang Munti. Nabulgar ang mga ngalan sa mga dagkong drug lords sama nila ni Peter Co, Herbert Colangco, Jaybe Sebastian, ang kanhi police dinhi sa Sugbo nga si PO3 Engelberto Durano ug daghan pang uban nga maoy gitumbok nga banggi-itang mga drug lord didto sa Munti. Mitestigo ang maong mga druglord sa House investigation ug ningtumbok kang kanhi DOJ Secretary ug karon Senador Leila De Lima nga maoy nagprotihir kanila. Gihulipan ang mga jail official ug mga jail guards gikan sa Bureau of Corrections og mga elemento sa PNP/SAF kay matod pa kakonsabo ang maong mga jail official sa mga drug lord nga tigdawatan og dakong protection money.
Gibutangan pa og signal jammer aron dili na makakontak ang mga drug lord sa ilang kontak sa gawas gamit ang cellular phones. Apan bisan pa niini, wala pa diay gihapon mahunong ang operasyon sa illegal nga drugas sa Munti. Kasagaran sa mga drugas nga nakompiskar sa mga awtoridad dinhi gikan man gihapon diay gihapon sa Munti. Porbida no, wala pa diay kini gihapon mahunong. Kurapsiyon lang gihapon ang hinungdan. Dili makabalibad ang mga jail officials sa sindikato gumikan sa kadako sa kantidad nga ilang nadawat.
Ang mas makapa-alarma dinhi sa ato mao ang pangangkon sa usa ka drug personality nga bata-bata kaniadto sa napatay nga drug lord nga si Jeffrey “Jaguar” Diaz. Matod pa sa drug pusher nga si Jerkin Oralde nga iyang gikuha ang iyang supply sa drugas sa usa ka binilanggo sa Cebu City Jail. Tiaw nimo na. Kon atong touhan kining gibutyag ni Oralde mas migrabe diay ang pagkuyanap sa illegal nga drugas sa maong bilanggoan. Dinagko na nang distribution sa drugas sa Cebu City Jail.
Unya nagtuo kaha mo nga nakasulod ang drugas diha sa City Jail nga way kalibutan ang atong mga jail official ug jail guards? Nganong nakasulod man sa atong bilangguan kon estrikto kaayo ang ilang pagpatuman sa mga lagda? Ultimo kinatawo sa mga babayeng dalaw o bisita bukikion kon wa bay drugas nga gipasok. Unya karon naa diay ang tinubdan sa illegal drugs. Mas maayo nga imbestigahon sa City Hall ug Bureau of Jail Management and Penology. Dako ning binoang.
(bobby@sunstar.com.ph)