MOABOT sa 82 ka mga tinun-an ang nag-practicum sa Department of Social Welfare and Development (DSWD) sa ikaduhang semester sa 2016.
Kini nga mga estudyante gikan sa lainlaing mga tunghaan nga nagkuha og mga kurso sa Physical Therapy, Social Work and Psychology, Development Communication ug Political Science major in Public Management and Development.
Ang DSWD dunay Student Training Program (STP) nga nagdasig sa mga graduate ug undergraduates nga mokuha sa nagkadaiyang mga kurso.
Si Christine A. Escolano, Human Resource Management Officer II sa DSWD 7, niingon nga pinaagi niini, ang departamento makapalambo ug makapahanas sa kahibalo, batasan ug skills sa mga estudyante sa pagtuon nga ilang gipili.
“This also develop the students’ competencies and exposes them to actual practice in various settings,” dugang niya.
Siya nidugang ang STP maoy tubag sa demand sa taas alang sa takos nga mga professional nga makasugakod sa global competition ug excellence.
Matod niya ang DSWD 7 nagsilbi nga laboratoryo sa mga tinun-an nga masuwayan ug magamit ang mga teyorya nga ilang nakat-on sa ilang mga tunghaan.
Pinaagi sa STP, ang mga tinun-an gi-expose sa mga operasyon sa DSWD sa field office, komunidad ug mga sentro.
Si Escolano nidasig sa mga estudyante nga nagkuha og mga kurso bahin sa behavioral sciences, secretarial, psychology, library science ug information technology nga mag-practicum o mag-OJT sa DSWD-7 ug mahimo nga kabahin sa social welfare agency nga andam mohatag og “Maagap at Mapagkalingang Serbisyo.” (PR)