MALIPAYON ug bulahang bag-ong tuig natong tanan! Mao ning panahona nga hapit tanan natong gihunahuna ug giplano mga maanindot nga mga butang o panghitabo.

Hinaut nga matinuod ang atong mga damgo ug nga moasenso bisan unsa kagamay (pero mas nindot og medyo dakodako, hehe!) ang atong mga kinabuhi.

Ning panahona usab, ang gilantaw sa mga taga Cebu ug ubang mga dapit mao ang labing dakong festival sa nasud, ang Sinulog. Syempre, wala kining maong festival kon wala ang kalihukan nga gigikanan niini, ang Pista Senyor nga halad ngadto ni Senyor Santo Niño.

Giablihan ang Pista Senyor kagahapon pinaagi sa prosesyon nga Walk With Jesus nga giapilan sa pila ka libo nga mga deboto. Mga misa kada adlaw giandam hangtod sa pista mismo.

Prosesyon sa dagat ug sa kadalanan ug ang mga misa konselebrada ang mga dagkong kalihukan sa simbahan. Sa kalingawan, naa ang Sinulog Idol sa Fuente Osmeña circle, Cebu Popular Music Festival, ang Sinulog Festival Queen ug ang Sinulog Grand Parade.

Karon pa lang, ato nang planohon kon unsa nga mga kalihukan ang atong tambongan aron makapangandam pod ta unsay angay dad-on ug uban pa. Karon pa lang, atong isinggit og kusog: Pit Senyor!

***

Nahimuot ko nga daghan sa atong mga kauban sa buhat sa media ang nigamit na gyud sa “grand parade” kon Sinulog na ang hisgutan.

Personal nga nihangyo nako pila na ka tuig ang nilabay si Maam Dollie Suzara ug si Sir Ricky Ballesteros sa Sinulog Foundation Inc. nga tabangan pagsabwag sa kasayuran nga sayop ang paglarawan sa Sinulog isip “mardi gras” kay usa lagi kini ka “grand parade.”

I-Google na lang ninyo ngano nga sayop ang mardi gras kon ilarawan sa Sinulog.

***

Lima ra sa walo ka mga entrante sa Metro Manila Film Festival ang akong nakita. Wa na makaya sa budget (hehe!) ug sa panahon. Pero naa pa man ang pila ka mga pelikula, mahimo pang mapun-an pagtan-aw.

Nalingaw ko sa Die Beautiful. Wa siya mamugos nga magpakatawa pero nibahakhak ang mga nanan-aw adtong pagsuon sa karakter ni Paolo Ballesteros sa inartehan ni Jaclyn Jose bisan kon nasuko na.

Naabli ang akong mata sa mga kamatuoran sa kinabuhi sa mga igsooon natong Overseas Filipino Workers labina sa mga domestic helpers sa Hong Kong sa pelikulang Sunday Beauty Queen. Morag di siya documentary kay maayong pagka-edit.

Nikaging ko pagsulti adtong usa ka employer nga gi-interbyu nga ingon-ingon ani: ‘If the Philippines will stop sending helpers to other countries, the world will be in trouble.’ O-ha! Kana tungod sa kamahinungdanon sa trabaho sa mga helpers ug sa kadaghan nila sa tibuok kalibutan.

Wa ko masorpresa nganong wa kadaug isip best actress si Nora Aunor bisan maayo ang iyang pag-arte sa Kabisera. Wa ko mahimuot sa istorya ug sa pagpadagan niini.

Usa ko sa gigil-asan samtang nagtan-aw sa esena sa Oro diin gipatay ug giluto ang usa ka iro. Niadto pa lang, nakapangutana ko kon wala ba kahay moreklamo. Ug tuod man...! In fairness, maayo ang pag-arte ni Irma Adlawan ug bisan si Joem Bascon.

Makaulpot sa lingkuranan ang pila ka esena sa Seklusyon. Nindot ang pagpadagan sa istorya. Wala lang kaayo ko makakuha sa tumoy na nga bahin. Nagduka tingali ko o may laing gihunahuna. Weeey!

In fairness, nindot gyud ang pelikula. Usbon ko, kon di lang mosimang ang komitiba sa MMFF ug ipadayon ang ilang gipatuman karong tuiga, seguradong moumento ang kalidad sa mga pelikula nga moapil.

Ngano, may mahimo ba ang dagkong prodyuser kon mosupak sila? Gusto ba silang ma-backstage na pod? Ana!

***

Kon motuo mo sa Chinese o oriental horoscope, ang 2017 mao ang tuig sa fire rooster o sunoy nga nagdilaab. Laliman ka ana?

Lagmit molampos kuno ang mga kalihukan kon ubanan sa tininuod nga paningkamot ug panlimbasog. Di kay bandyingbandying lang o kanang oki na kana!

Kinahanglan ang pagpasingot aron ma­kab-ot ang pangandoy. Usbon ko: malipayon ug bulahang bag-ong tuig!