Mobalik ang aksyon

Mga duwa karon

4:15 pm- GlobalPort batok Meralco

7:00 pm- San Miguel batok Blackwater

HUMAN sa hamubong ba­kas­yon gikan sa Kapaskuhan, mobalik ang aksyon sa Philippine Basketball Association (PBA) Philippine Cup diin duha ka gilaumang ek­plosibong mga kombati ang masaksihan sugod karong hapon sa Mall of Asia Arena.

Sa premirong duwa, ang GlobalPort Batang Pier makigbatok sa Meralco Bolts samtang mag-abot sa main game ang defending champion San Miguel Beermen batok Blackwater Elite.

Ang Beermen mokombati ning higayuna nga wala ang ilang labing pambatong pointguard nga si Alex Cabagnot.

Nabuak ang ilong ni Cabagnot atol sa katapusang duwa sa 2016 diin mingdaog ang Beermen batok sa Meralco, 101-86. Sa kasamta­ngan, naghubag gihapon ang ilong ni Cabagnot.

“My expected time to play will be on Sunday. Friday is a little bit too premature because the swelling still hasn’t subsided,” pasabot ni Cabagnot sa interbyu sa Spin.ph.

Bisan wala si Cabagnot, aduna gihapo’y igong puwersa ang Beermen ug nasayod si Blackwater coach Leo Isaac niini.

“That’s only one player. We still have to worry about the other players on that strong team,” pasabot ni Isaac.

Wala man tuod si Caganot apan ang Beermen adunay higanteng si 3-time MVP JuneMar Fajardo ug kanhi MVP Arwind Santos nga seguradong maghatag og labad sa ulo sa Elite.

Ang Beermen kasamtangang nag-una sa standing dala ang 5-1 nga rekord samtang ang Elite na­butang sa ikatulong dapit bitbit ang 4-3 nga rekord kauban ang Phoenix Fuel Masters.

Kon nagbakasyon ang ubang teams niadtong Bisperas sa Bag-ong Tuig, ang Batang Pier nagprak­tis aron makorehian ang sayop nga ilang mga nahimo sa katapusang nilang duwa sa 2016.

Ang Batang Pier nakaposte og 26 puntos nga labaw sa 4th quarter batok sa Phoenix sa maiging semana apan nakagukod pa ang Fuel Masters ug nakuha ang 101-99 nga kadaugan.

Isip silot, nagpraktis ang Ba­tang Pier sa pagsugat sa Bag-ong Tuig.

“We didn’t go on a break because we meant to correct yung mga mistakes namin,” asoy ni Batang Pier coach Franz Pumaren. “We have to fine-tune everything and go back to the basics again.”

Nanghinaot ang Batang Pier nga ang leksyon nga ilang nakat-unan gikan sa ilang mga sayop ila nang magamit batok sa Bolts.