NAKADESISYON ang defending champion nga si Noel Tillor nga modagan gihapon sa 42-kilometer men’s race sa Cebu Marathon karong Dominggo nga manukad sa Cebu Business Park.

Hinuon giklaro sa four-time champion nga dili siya magpunterya sa pagdepensa sa korona, gusto lang siyang magpakondisyon ug mag-relax.

Gipasabot sa 31 an­yos nga mekaniko nga ang iyang pagdagan ipahinungod niyang kang Señor Sto. Niño isip pa­salamat sa mga grasya nga iyang nadawat.

Sa miaging buwan, wala pa nakabuhi og pinal nga desisyon si Tillor kon modagan ba siya sa Cebu Marathon.

“I decided to race. Pero wala kaayo ko practice. I will just listen to my body. Hopefully I will have a good body condition on race day,” matod ni Tillor sa interbyu sa Sun.Star Cebu, igsuong buhatan ning mantalaan.

Si Tillor nahimong kampiyon sa lumba gikan niadtong 2012 hangtod 2014 ug 2016.

Lakip sa mga sayong pa­borito nga modaog sa korona sa men’s local 42K mao ang kasamtangang kampiyon sa Cebu Leg Milo Marathon men’s event nga si Rafael Pescos sa Spectrum Runners Club.

Si Pescos, 22, usa ka Cebu-based runner nga gikan sa Negros Occidental, milupig kang Tillor sa Baybay City Marathon sa miaging buwan.

Ang Cebu Marathon, nga nakadani og 4,000 runners, usa sa mga kalihukan alang sa kasaulogan sa Sinulog Festival.

Gawas sa 42K, ang ubang mga kategoriya sa Cebu Marathon mao ang 21K, 10K, ug 5K.

Sa labing unang higayon sa 10 ka mga tu­ig nga kasaysayan sa lumba, ang Cebu Marathon mosubay sa tulo ka mga siyudad sa Cebu, Mandaue ug Lapulapu.

Sa nag-unang siyam ka mga tuig nga pagpahigayon, ang lumba misu­bay lang sa mga siyudad sa Cebu ug Talisay.

Ning higayuna, miabot sa 154 ka langyawng runners gikan sa 30 ka mga nasod ang mangapil sa lumba, nga giorgani­sar sa Cebu Executive Runners Club (CERC) ug Runrio.