PAREHONG nagbangis sila si Stephen Curry ug Kevin Durant aron pangulohan ang kadaugan sa host Golden State Warriors batok sa Portland Trail Blazers, 125-117, kagahapon sa National Basketball Association (NBA).
Si Curry nipupo og 35 puntos lakip na niini ang lima ka three-pointers samtang nidugang og 30 puntos si Durant.
Ang Trail Blazers padayong ningkombati nga wala ang usa sa ilang labing sinaligan nga si Damian Lillard.
Gipangulohan ni C.J. McCollum ang Trail Blazers pinaagi sab sa iyang 35 puntos.
Si Lillard, kinsa nag-average og 31.8 puntos, sulod na sa lima ka mga duwa nga wala nakapakita og aksyon gumikan sa iyang angol sa wala nga tiil.
Kini maoy ikalimang sunodsunod nga kadaugan sa Warriors batok sa Trail Blazers. Mao kini ang labing taas nga sunodsunod nga kadaugan sa Warriors batok Trail Blazers human sila nakamugna og pito nga nagsugod niadtong Pebrero 20, 2005 hangtod Nobiyembre 3, 2006. AP/ESL