GIMUGNA ni Jimmy Butler sa 4th quarter ang 14 sa iyang kinatibuk-ang 20 puntos aron agakon ang Chicago Bulls ngadto sa kadaugan batok sa host Cleveland Cavaliers, 106-94, kagahapon sa National Basketball Association (NBA).
Si Butler, kinsa gikan pa sa iyang 52-point performance batok sa Charlotte Hornets, daw nag-inusarang sundalo nga nakigbatok sa Cavaliers sa 4th quarter. Adunay higayon ning maong quarter nga nakapupo siya og 10 ka sunodsunod nga krusyal nga mga puntos.
“That’s all I (expletive) care about,” matod ni Butler.
Si Doug McDermott nidugang og 17 puntos alang sa Bulls, nga ningposte sa ilang season-high nga 13 ka three-pointers.
Ang Cavaliers ningkombati nga wala gihapon ang duha sa ilang Big Three nga sila si Kyrie Irving ug Kevin Love unya dili sab 100 percent ang kondisyon ni LeBron James kay aduna kini sip-on.
Si Irving padayong nagpaalim sa iyang angol samtang si Love nagpahuway pa human nabiktima sa food poisoning.
Mga 20 minutos sa wala pa nagsugod ang duwa, mianunsyo si James nga moduwa siya bisan aduna siya’y gipamati sa lawas.
Bisan pa niini, si James, 4-time MVP, nakamugna gihapon og 31 puntos aron pangulohan ang Cavaliers.
Sa 1st quarter, nagkagidlay pa ang three-point shooting sa Bulls ug igo lang kining nakapasulod og usa sa walo ka mga pagsuway.
Apan human niini, nagpauwan na og three-pointers ang Bulls nga nakahatag kanila og 15 puntos nga labaw sa hinapos nga bahin sa 3rd quarter.
Sa pagpangulo ni James, ang Cavaliers nakasikit pagbalik, 88-89, sa sayong bahin sa 4th quarter apan human niini, nagmangtas na si Butler aron ablihan og dako ang pultahan sa Bulls paingon sa kadaugan.
Nagkagidlay ang duwa ni Butler sa nag-unang tulo ka quarters apan nausab ang tanan dihang gisultihan siya sa iyang kaubang All-Star nga si Dywane Wade nga giyahan ang Bulls.
“A guy that wears No. 3 on this team came to me and was like, ‘Win the game,’” batbat ni Butler kabahin kang Wade. “So I guess a switch (turned) on, and I was like, ‘Yo, get a couple baskets and try to get some stops on the defensive end.’ I think I did all right.”
Gitataw ni Butler nga nadasig siya sa gipamulong ni Wade ngadto kaniya.
“That’s my job, to be aggressive,” matod ni Butler. “I knew I was going to have to do that in the fourth anyway. But with him telling me that, I can’t let D-Wade down. D-Wade has been doing that for years. The fourth quarter is always go time. I want to show I belong here.” AP/ESL