LUNA sa South Road Properties (SRP) nga lakip sa ibaylo sa Cebu City government sa 93-1 lots, planong balhinan sa Kapitolyo sa Cebu South Bus Terminal (CSBT).
Tagdumala sa terminal nihangop niini aron mas mapalapdan ang pasilidad ug di na usab sila makatampo sa paghuot sa traffic sa N. Bacalso Avenue area.
Gitug-an ni Gobernador Hilario Davide III nga gitun-an karon sa Kapitolyo ang pagbalhin sa CSBT ngadto sa SRP.
Ang Kapitolyo gipaabot nga makaangkon og 2.5 ka ektaryang luna sa SRP kon hingpit na nga matuman ang land swap deal tali sa Probinsiya ug Siyudad.
Ang luna lakip sa ibaylo sa City Government sa mga luna ubos sa 93-1 sa Kapitolyo.
Sa pagkakaron, ang CSBT nagbarug lamang sa 1.1 ektaryang luna sa N. Bacalso Avenue sa dakbayan sa Sugbo.
Gitan-aw nga gamay ra kaayo kini alang sa nagkadaghan nga mga pasahero ug mga bus sa terminal.
Gipadayag hinuon ni Davide nga di kabahin sa prayoridad ug dinalian ang mao nga plano sa Kapitolyo karong tuiga ang pagbalhin sa CSBT.
Gitun-an kini ilabi na kay nagkagrabe na usab ang traffic sa kasamtangan niini nga nahimutangan.
Ang operations manager sa terminal, Joey Herrera, sa iyang bahin, nihangop sa posibleng pagbalhin sa CSBT ngadto sa mas dako nga luna diha sa SRP.