NIREKLAMO ang pipila ka mga molupyo sa Carmen gumikan sa suliran sa suplay sa tubig sa lungsod.
Si Cogon West Barangay Kapitan Rene Mahilum nibutyag nga di kaabot og usa ka oras ang agas sa tubig sa ilang barangay.
Matod niya ang tubig moagas alas 5:00 sa buntag, apan di maabtan og usa ka oras, mapawong na usab.
Si Pinky Capangpangan, secretary ni Mayor Martin Gerard Villamor, niingon nga naapektahan ang supply sa tubig sa pipila ka mga barangay sa lungsod gumikan sa nagpadayon nga trabaho sa karsada sugod sa Barangay Cogon West hangtod sa Barangay Corte diin naigo sa backhoe ang tubo.
“Arang-arang naman ang among tubig karon kaso lang maigo anang back hoe sa giayo nga karsada sa Barangay Cogon West. Karong bag-o, kaduha sa usa ka semana na maigo sa back hoe unya dugay baya maayo,” asoy niini sa Superbalita Cebu kagahapon.
Siya nidugang nga dugay na nagtinguha si Villamor nga dumalahon og pribado nga grupo ang pagpadagan sa tubig sa ilang lungsod.
“Di man makaya sa munisipyo kay way expert sa tubig. Si Mayor sige ingon nga private individual para maka-avail sa maayong pagpadagan sa tubig,” dugang ni Capangpangan.
Si Mahilum niingon nga nagbayad sila og P35 matag buwan alang sa suplay sa tubig kansang tinubdan gikan sa Uragay Spring.
Giingong moabot sa 104,000 cubic meters ang demand sa tubig sa Carmen, apan gikataho nga 52,000 lang ang produksyon sa Carmen Water Works.
Si Mahilum namahayag nga duna untay pribadong kompaniya ang gusto mosud sa ilang lungsod ug maoy modumala sa pagpadagan sa ilang tubig apan wa ni aprobahi sa konseho sa lungsod atol sa ilang session niadtong katapusang Biyernes sa Disyembre.
Ang among gusto masulbad ang problema pero moagi man og konseho wa ko kahibawo unsay tuyo nila nga di mosugot. Bahala momahal among bayranan basta sige og agas ang tubig 24 oras,” pahayag sa kapitan.
Suma pa niini nga gawas sa iyang barangay, laing siyam pa ka mga barangay ang dunay problema sa tubig nga naglakip sa Puente, Luyang, Cogon East, Baring, Poblacion, Dawis Sur, Dawis Norte, Cantumog ug Cantipay.
Si Mahilum nidugang nga unom lang sa 21 ka mga barangay sa Carmen ang maserbisyohan sa water works sa lungsod.