NA-STROKE ang ama­han ni Pamela Machacon, 46, niadtong Marso sa miaging tuig ug siya nanginlaba ni Señor Santo Niño.

Kagahapon sa kaadlawon, si Pamela uban ang iyang pamilya ang usa sa liboan ka mga tawo nga niapil sa ‘Walk with Jesus’ sa pagbukas sa unang nobenaryo sa kapistahan sa Milagrusong Bata, agi og pagpasalamat sa kaayohan sa iyang amahan nga si Angelito, 74.

Bata pa lang, nahimo na siya nga deboto ni Señor Santo Niño nga iyang nakat-onan sa inahan sa iyang apohan nga babaye nga si Carolina sa habig sa iyang amahan.

Napananunod nila ang usa ka itom nga Santo Niño gikan ni Carolina nga maoy ilang ampuan sa matag piyesta niini.

Bisan sa kabaga sa duot sa mga deboto nga gibana-banang mga 40,000, way bisan usa ka insidente sa krimen ug di maayong hitabo nga natala ang kapulisan atol sa `Walk with Jesus’ kagahapon sa kaadlawon.

Matod ni Sr. Supt. Joel Doria nga kapin sa 300 ka unipormadong mga pulis ang iyang gipakatap, wa pay labot sa mga wa mag-uniporme nga gitahasan sa pagbantay sa mga kriminal.

Gawas sa mga pulis, iyang gibutangan og mga patrol car ang matag eskina sa Osmeña blvd. nga gilagbasan sa prosesyon.

Usa ka oras usab sa wa pa sugdi ang prosesyon, iyang gipasusi ang Pilgrim Center sa Special Weapons and Tactics ug Explosive Ordnance Division kon wa bay kadudahang mga butang.

Si Padre Pacifico Nohara Jr., rector sa Basilica Minore del Santo Niño, namahayag nga sa kadako sa debosyon sa mga Pilipino sud ug gawas sa Pilipinas, apan makita usab sa nasod ang daghang mga libudsuroy nga kabataan ug mga biktima sa abuso.

Siya nidasig sa mga tawo nga pinaagi sa debosyon sa Balaang Bata, makat-unan usab nila ang pagpakabana, pag-atiman ug paghigugma sa kabataan ug mga mahuyang sa katilingban.

“Nagkadaiyang hulagway ang mga imahen sa Santo Niño nga atong gidala sa procession giampingan, gimahal nato ang imahen. Apan wa kita’y pagpakabana sa kahimtang sa mga kabataan sa atong katilingban,” pamulong ni Nohara sa iyang wali.

Nalipay

Nakadayeg si Konsehal Dave Tumulak sa gipa­tuman nga seguridad atol sa kalihokan.

Gihulagway ni Tumulak ang gipatumang security preparations nga ‘exemplary’ ang gibuhat sa nagkadaiyang mga ahensiya sa gobiyerno.

Iyang nakita ang pre­sensiya sa kapulisan ug ubang law enforcers la­kip na ang mga intel personnel.

Gihulagway ni Tumulak nga malinawon ang prosesyon.

Samtang nakigtagbo usab si Cebu City Mayor Tomas Osmeña sa kadagkuan sa Sinulog Foundation Inc., aron pagahisgutan ang dugang pagpangandam sa Sinulog 2017.