HIMUONG mga peace auxiliary kun mga tigpaniid ang mga habal-habal driver sa dakbayan sa Sugbo human sila gihangyo nga motabang sa pagpatuman sa kahapsay ug kalinaw hilabi na karong Sinulog 2017.
Gibansay sa kapulisan sa Cebu City Police Office (CCPO) ang mga opisyal sa nagkadaiyang mga organisasyon sa mga habalhabal driver alang ning mao nga katuyoan.
Nanawagan usab karon ang kagamhanan sa Siyudad sa Sugbo nga di himuong binuang ang bomba aron di makamugna og kahadlok sa katawhan.
Pipila na ka mga tawo dinhi sa dakbayan sa Sugbo ang gidakop ug napriso tungod sa pagbinuang kabahin sa bomba.
Niabot og 150 ka mga opisyal sa nagkalainlaing organisasyon sa habal-habal sa siyudad ang mitambong sa panagtigom nga gipatawag ni Konsehal Dave Tumulak, deputy mayor for police matters kagahapon sa buntag sa Cebu City Hall.
Si Tumulak nipatawag kanila aron pagpangayo sa ilang tabang.
Gisultihan sila ni Tumulak nga himuon sila nga mga peace auxillary kun tigpaniid subay na nagkaduol ng kasaulogan sa Sinulog.
Matod ni Tumulak nga isip mga peace auxiliary, makig-alayon ang mga habal-habal drivers sa kapulisan ug ubang law enforcement agencies kon duna silay mabantayan nga kadudahang tawo, lakip na sa mga butang nga gibilin ug way tag-iya.
Gumikan kay gikinahanglan man ilang tabang ug isip mga first responder, gipaubos sa training ang mga habal-habal driver sa mga sakop sa Special Weapons and Tactics (SWAT) sa Cebu City Police Office sama sa mga bombing incident.
Sigon ni SPO4 Danilo Rosales, Explosives Ordnance Disposal (EOD) trainer sa Swat Cebu City, tumong sa maong training nga mahatagan bisan gamay nga ideya ang mga habal-habal driver mahitungod sa mga nagkalain-laing klase sa bomba.
Dugang ni Rosales nga gitudlo usab nila sa mga habal-habal driver kon unsay buhaton nila kon dunay makit-an o mabantayan nga kadudahang butang nga gibilin, di lang sa kadalanan, lakip na sa ubang mga lugar.
Dunay gatusan ka mga habalhabal driver nga nagbiyahian sa kadalanan sa siyudad sa Sugbo.
Kadaghanan kanila nagbiyahian sa mga dapit nga way pampublikong mga sakyanan.
Bisan medyo taas og singil, dunay mga trabahante nga mas pabor sa pagsakay og habalhabal kay daling makalusot taliwa sa trapiko.