SUKAD nga gisugdan ang hugot nga pagpatuman sa Anti-Jaywalking Ordinance sa dakbayan sa Davao, miabot na og 3,646 ang mga nangadakpan kay misupak niini.

Ang Davao City Transportation and Traffic Management Office (CTTMO) nagsugod sa pagpatuman sa ordinansa niadtong unang adlaw sa Disyembre 2016.

Mga nadakpan sa kalapasan giisyohan og mga citation ticket ug gi-obliga ug gipailawom sa usa ka oras nga seminar sa CTTMO Compound sa SIR sa Matina ning dakbayan matag Biyernes.

Tumong sa pag-implementar sa ordinansa, aron nga madisiplina ang publiko ug maseguro ang ilang kaluwasan samtang molabang sa mga kadalanan sa dakbayan.

Sa tinuod lang, maayo baya kining maong ordinansa. Angayan lang nga kita mismong taga Davao mosunod sa atong mga balaod dinhi kay sayud kita nga ang Dabawenyo kanunay himuong ehemplo ni Presidente Rodrigo Duterte panahon nga duna siyay mga panagpulong nga himuon.

Gihimo niyang sumbanan ang Davao ngadto sa ubang mga lugar sa nasud diha sa pagpatuman sa mga programa sa iyang administrasyon.

Mao nga angayan lang nga ipakita sab nato ngadto kanila nga angayan kita sa mga pagdayeg sa atong presidente.

Samtang isugyot sab nato ngadto sa CTTMO nga angay sab nga hatagan nila og pagtagad ang pipila ka mga drayber nga mga abusado ug nagsupak sa balaod trapiko.

Kay lisud na kon ang mga pedestrians lang ang idisiplina apan mga drayber pasagdan lang mosupak sa balaod.