DIGOS CITY -- Gihugtan na sa Davao del Sur Provincial Police Office (DSPPO) ang seguridad lukop probinsiya human sa nahitabong jail break sa North Cotabato District Jail (NCDJ) sa Barangay Amas, Kidapawan City.
Gimando ni Provincial Police Director Samuel Gadingan ngadto sa tanang hepe ang pagmuntar og mga random checkpoint aron susihon ang mga sakyanan ug motoristang mosulod gawas sa probinsiya.
Kahinumdoman nga mipuga ang kapin 100 ka mga priso sa NCDJ ala-una sa kadlawon niadtong Miyerkules, Enero 4, hinungdan nga gitaas dayon ang seguridad sa probinsiya.
Dungan niini, gipahugtan sab ang alerto sa mga bilanggoan sa probinsiya sama sa Digos District Jail ug Provincial Rehabilitation Center (PRC).
Nanaghap ang kapulisan nga mitago ang ubang pugante sa probinsiya mao nga mitabang na sab sila pagpangita niini.
Sa pagsubay sa SunStar SuperBalita, nasayran nga 28 na sa 158 ka mga pugante ang nahibalik sa prisohan niadtong Huwebes sa buntag.
Ang bilanggoan adunay 1,511 ka mga piniriso.
“Unang narekober yung 12, tapos may 16 na nahuli sa area ng 7th Infantry Division. So posible yung iba dyan pumunta sa Sur kasi medyo mainit na rin sila dito,” butyag ni Philippine Army 39th Infantry Battalion commanding officer Harold Argamosa dihang gihinabi sa telepono.
Nasayran sa imbestigasyon nga si Kumander Derbi ang nangulo sa pag-atake.
Si Derbi giingong usa ka gun-for-hire ug usa ka terrorist-for-hire apan gamay lang ang grupo niini.
Gitataw ni Argamosa nga si Derbi kanhi nang nabilanggo sa district jail apan nakasibat niadtong buwan sa Agosto 2016 ug nagbahad nga manimawos.
Kanhi konektado sab sa Moro Islamic Liberation Front (MILF) si Derbi apan gipalagpot sa wala matinong rason.
Pito ang gitahong namatay sa pag-atake apan nagpadayon pa ang hot pursuit ug clearing operation sa mga awtoridad nga hayan moresulta sa shoot-to-kill order ugaling magmagahi ang mga pugante nga itahan ang ilang kaugalingon.
Dungang niini, giawhag sab ni Gadingan ang publiko nga mahimong vigilante ug motaho dayon sa kapulisan ugaling makamatikod og mga tawong katingad-an ang lihok sa ilang pagsulod dinhi sa Davao del Sur.
Usa sa mga naghugot og seguridad ang lungsod sa Bansalan nga hayan unang tagoan sa mga pugante apan padayong nag-monitor ang mga awtoridad.