DILI malalis nga usa sa mga kinakusgan nga chessplayer si Johnnel Balquin sa Cagayan de Oro.

Usa siya sa akong suod nga higala ug pare, apan naa lang gayud ko'y dili masabtan sa iya ning panahon.

Bago pa matapos ang tuig 2016, gapang-ugat na si Ismar Irenick Estrella pagmugna sa Cagayan de Oro-Misamis Oriental (CDO-MisOr) All-Star Team nga isangka batok sa Davao All Stars tali sa ilang goodwill match ugma bago masugdan ang Tablon Classification Team Tournament.

Lipay na kaayo si Estrella nga mamugna na niya ang kinakusgan nga line-up sa CDO-MisOr kay gusto nila matabla ang ilang lifetime score nga 1-1 diin naunhan sila sa Davao sa niaging tuig.

Apan kalit lang nibalibad si Balquin tungod sa dili masabtan nga rason ug wala ko ganahi.

Akong nadunggan si Balquin nga dako iyang pagmahay sa organizers sa Explore Misamis Oriental Chess Cooperative ug sa chess patron nga si Roly Tan tungod sa patakaran sa year-end tournament niadtong Disyembre 30.

Matod pa niya nga nainsulto siya nga wala makabantay ang tig-ihap sa move limits sa community chess team hinungdan siya nakapildi sa team ug gikataw-an pa sa iyang kaatbang.

Pero kon unsa man na nga bingkil, dili unta hinungdan nga masakripisyo ang team batok sa Davao. Hinaut nga makaamgo si Balquin unsay tinuod nga kahulogan sa “Dakbayan sa Bulawanong Higalaay” diin nakalakra sa iyang yellow nga t-shirt.

Dapat magarbohon siya nga modula sa team labina nga daan na siya nikompirma nga modula.

Naa sab sa suliran karon ang CDO-MisOr Team labina nga misupak ang Davao sa presensya nako ug ni Bong Vasquez sa board 11 ug 12 sa executive board samot na nga wala si Balquin.

Hinaot lang ta nga maayo ang dagan sa CDO-MisOr taliwala sa suliran.