MOKABAT ngadto sa 14 ka mga samad ang naangkon sa usa ka driver human gipusil niadtong Huwebes, Enero 5, alas 3:55 sa kaadlawon sa Masterson Avenue atubangan sa Xavier Heights, Upper Balulang, dakbayan sa Cagayan de Oro.
Talandugon ang kahimtang ni Ramil Pagara, 39, minyo, driver sa Lumbia liner ug taga Zone 2, Lumbia ning dakbayan.
Sa inisyal nga imbestigasyon sa kapolisan, nasuta nga ang namusil sakay sa Mitsubishi Montero nga kolor itom nga nagdala sa numero sa plaka nga 6165 (wala nakuha ang letra).
Gibutyag ni Senior Police Officer 3 Lito Baculio, imbestigador sa Police Station 4 sa Carmen nga away sa kalsada ang posibleng hinungdan sa pagpamusil sigon na usab sa saksi nga 13 anyos kinsa pag-umangkon sa biktima nga sakay niadtong higayona sa dyip.
Basi sa giasoy sa 13 anyos nga natagbo nila ang Montero atubangan sa Gran Europa dihang miliko kini sa wala nga bahin paingon sa sentro sa dakbayan dihang hapit maigo sa dyip.
“Pagkuan sa jeep gisabayan ni siya sa Montero sports, so kamulo nang dagan kamulo silang lalis, ug didto dayon mihunong sa may Xavier Heights, iyang gi-estorya mao to iya dayong gitaparan. Naay pasahero sa may gate 2 mao to nihunong…Naa pa gale to’y gibilin nga word gani threatening words sa suspek giingnan siya sa suspek nga, ‘Pagtarong mo bay ha! Basig gusto mog gubot,’” butyag ni Baculio.
Giingong nakaangkon og lima ka mga samad pinusilan ang biktima apan sigon sa doktor nakaangkon kini og 14 ka mga samad tungod sa posibleng pagbanda-banda sa bala sa pusil diha sa sakyanan ug paingon diha sa iyang lawas.
Dali nga gidala ang biktima sa pinakaduol nga balay tambalanan ilabi na diha sa JR Borja City Hospital apan gibalhin kini sa Northern Mindanao Medical Center kinsa padayon pa nga gi-atiman sa mga mananambal human nakaangkon og samad pinusilan sa iyang dughan, tiyan, kamot ug tiyan.
Sa pagkakaron, ang biktima ang padayon pa nga nakigbugno sa kamatayon gumikan sa grabe nga samad niini nga naangkon.