MAAYONG adlaw nga Martes sa tanang mga ka-Super Suki niining atong gimahal nga mantalaan. Kumusta kamo diha sa inyong nahimutangan karon? Manghinaut kitang tanan nga anaa kita sa luwas nga kahimtang uban sa pagpangaliya sa atong Labaw'ng Makagagahum.
Ikaduhang adlaw karon sa klase, diin kagahapon dunay daghang mga problema nga misugat sa pagbukas sa klase usa na niini ang kakulang sa mga lawak.
Busa karong adlawa, hisgutan nato ang topikong "unsa kaha kaandam ang Department of Education (DepEd) sa mokabat 24-milyones ka mga estudyante nga mitungha karon sa academic year 2015-2016."
Subay sa pinakaulahing update gikan sa DepEd, anaa sa 24-milyones ang mga estudyante karong tuig itandi sa 19-milyones sa miaging tuig.
Giingon sa DepEd nga "all systems go" na o andam na gyud ang mga eskuwelahan sa pagdala sa mga tinun-an, apan usa sa mga problema mao ang kakuwang sa mga lawak ug lingkuranan.
Samtang sa DepEd 11, wa pa hinuon nakita ang kakuwang sa mga lawak, apan didto na kini masayran sa sunod semana tungod kay mosulod na ang pipila ka mga estudyante labi na kadtong tua pa sa mga probinsiya.
Niining dungan sa pagtaas sa ihap ug ang pagpatuman sa K to 12, bastante kaha ang kasamtangan nga mga lawak sa maong gidaghanon? Unsa sa inyong tan-aw ang puwedeng mahimo sa DepEd ugaling mosamot ang problema? Di ba kaha kini ang hinungdan nga di na lang ipadayon ang pagpatuman sa K to 12?
Sa inyong mga panglantaw, mamahimo ninyong ipadangat sa atong text hotline, ania ang atong mga nahinabi:
Kuwang gyud
"Sa akong tan-an, andam mi nga mga magtutudlo sa mga pamaagi sa pagtudlo ug pagdala sa mga estudyante, apan daw di gyud andam ang daghang schools kay makita man gyud nato nga kulang gyud ang mga classrooms, silya ug mga textbooks. Gani kami sa Special Education (SpeD) maningkamot gyud mi unsaon paghimo og pamaagi nga mogamit og mga learning materials nga gikan sa among kaugalingon ug sa mga inahan nga inisyatibo." Agney F. Tatoy, SpeD teacher, Bolton Elementary School, Davao Central District, Davao City
Daan nga problema
"Sa una pa man gyud na nga problema ang kakuwang sa mga classrooms ug silya, pero sa karon, kini na ang higayon nga hatagan og kasulbaran sa DepEd ang maong problema labi na kay nagpatuman na sila og K to 12. Unsaon na lang ang sitwasiyon sa edukasyon sa Pilipinas kung magpadayon kini. Kay gi-upgrade naman ang sistema sa edukasyon, i-upgrade sa unta ang mga facilities." Joshua Gabriel B. Pichon, Self-employed, Davao City