Mongaya: Plunder

KASONG plunder ang gi­rekomenda sa Senate Blue Rib­bon subcommittee nga ipasaka batok kang Bise Presidente Jojo Binay human sa pipila ka bulan nga pag-imbestiga sa pipila ka mga alegasyon nga pangurakot.

Ang plunder nagpasabot nga ang kantidad nga nakurakot di momenos sa P50 milyones. Sa mga alegasyon batok kang Binay ug iyang mga hinanib, binilyon man ang kandidad nga nalambigit.

Atong timan-an nga kining maong mga giingong pagpangawat sa kaban sa kagamhanan nahitabo samtang si Binay mayor pa sa Syudad sa Makati.

Kakuyaw kon siya mahimong presidente sa nasud. Pila kaha ka pilo ang mawagtang sa pundo sa katawhan?

Maayo na lang kay nabonggo na si Binay. 

Usa sa unang nipirma sa maong rekomendasyon mao si Sen. Grace Poe nga gipa­ngu­litawhan ni  Binay nga mahimong iyang bise presidente. Kini human nakabuhi si Poe og sakit-sakit nga mga pulong dihang iyang gibalibaran ang tanyag ni Binay nga mahimong standard-bearer.

Matod pa ni Neal Cruz, daw way gustong makigparis karon ni Binay.

Oposisyon

Nagpasabot ba nga wa nay oposisyon karon nga mag-atubang na og makalilisang nga kasong plunder ang lider sa kowalisyon sa oposisyon?

Mao dayon kini ang giduso nga punto sa pipila nga mga pro-Binay. Murag si Binay lang ang bugtong lider sa oposisyon.

Apan sukwahi sa ilang gipamulong, daghan ang mahimong kapilian bisan karon pa lang. Nagposisyon na nga modagan si Mayor Rodrigo Duterte sa plataporma nga federalism ug paglimpyo sa Pilipinas niining mga kriminal.

Laing naninguha nga mo­dala sa plataporma nga estrikto nga law enforcement mao unya ang kanhi police chief ug kanhi senator nga si Ping Lacson. Akong giapil karon ang iyang ngalan kay nakahinumdom ko sa radio commercial nga naghisgot kabahin kaniya kagahapon sa buntag.

Ug di nato isalikway ang dakong posibilidad nga motumaw nga kandidato si Sen. Bongbong Marcos.

Kini sila ang magbahinbahin unya sa boto sa oposisyon.

Of course, di angayang kalimtan ang Pwersa sa Masa ni Mayor Erap Estrada. Kahinumdoman nga bisan pa man sa iyang pagka kumbikto sa kasong plunder, dako gihapon ang iyang suporta gikan sa masa. Gani, siya man ang ikaduhang labing dakong boto sa miaging 2010.

Roxas-Poe?

Hinuon, dako sab ang posibilidad nga makuha ni Sen. Poe ang suporta ni Estrada ug sa iyang PMP. Kana kon modesisyon siyang modagan pagka presidente.

Sa pagkakaron hinuon, wala pa modesisyon si Poe.

Ug alang sa mga kadagkuan sa Liberal Party sama nilang Senate President Franklin Drilon ug Speaker Feliciano Belmonte Jr., ang angayang paris karong umaabot nga 2016 mao silang DILG Secretary Mar Roxas ug si Sen. Poe.

Kahinumdoman, si Roxas nipadayag nga andam siyang mopadayon sa tuwid na daan ni Presidente Aquino. Wa man siyay anomaliya ug siya sab ang dunay lawom nga kasinatian sa pangagamhanan sa Gabinete karon ni PNoy.

Bisan pa man og ubos siya sa mga survey, di malimod nga daghan og kalampusan si Roxas nga napahigayon isip DILG chief alang sa mga local government units. Mao kini ang rason nganong nakuha niya ang pagsuporta sa mayorya sa mga mayor, dili lang sa Sugbo, apan sa tibuok Pilipinas.

Samtang si Poe parehong wa malambigit og anomaliya ug maoy mas popular, di sab malimod nga duha pa lang ka tuig siya nga usa ka senador.

Nasayran nga gitanyagan na si Poe nga mahimong bise presidente ni Roxas, gipaabot karon ang iyang tubag. Abangan.

(@anol_cebu sa Twitter)