MIBUKAS ang klase sa mga publikong tunghaan lukop nasud kagahapon. Ug sama sa naandan, nakasugat na usab og nagkalain-laing problema ang departamento sa edukasyon sama sa kalulangon sa mga classrooms ug mga magtutudlo. Kining maong problema kanhi-ay ra gyud kini apan hangtod karon wala pa mahatagi og solusyon.
Pun-an pa aning implementasyon sa K to 12 program samot na gyud og kayagaw.
Tiaw nimo nang nagsugod na ang klase apan dinhi sa Central Visayas nang-hire pa ang DepEd og dugang kuwatro mil ka mga magtutudlo. Nganong wala man kini kapangandami kaniadto pa. So, klaro na kaayo ang kakulangon sa mga magtutudlo. Unya kinsa may motudlo sa mga tinun-an nga dako mang kuwang ang mga magtutudlo?
Imong hatagan og additional load ang mga teachers nga kapuyon man usab na sila. Base sa atong Batakang Balaod, ang DepEd maoy gihatagan og dakong gahin aron gyud makahatag ang kagamhanan og kalidad nga edukasyon sa mga kabataan. Apan asa man pa-ingon ang maong gahin mga wala man gihapon masulbad ang mga kanhiay pang mga problema? Ang kadtong mga lugar nga na-igo sa nangaging kalamidad sama niadtong 7.2 magnitude nga linog ug bagyong Yolanda nga diin nangaguba ang mga school buildings kumusta na kaha kining maong mga lugar? Nakabangon na kaha sila?
K to 12
Kining implementasyon sa K to 12 makahatag nig dugang problema sa edukasyon. Wala man gani mahatagi og solusyon ang mga karaang problema, misamot na hinuon. Ang K to 12 nanginahanglan og dugang mga classrooms ug mga teachers. Unya nagdugang lang gasto sa mga ginikanan. Ambot og nganong gi-implementar pa gyud ni. Unsa may problema sa atong karaan nga school curriculum o educational system?
Nakahimo o naka-produced kita og mga banggi-itan nga mga leaders ug mga utukan sa atong karaan nga sestema. Nganong pun-a pa man gyud og laing duha ka level.
Aron gyud makabaton gyud og quality education. Hingupya lang gyud ta sa ubang nasud. Kay misagop sila aning K to 12 mao nga ato pod nga sagupon. Mas ngilngig pa kita og nahibaloan sa ubang nasud. Kay dinhi sa ato bisan ang wala makatiwas og eskuwela, makamao tang mo-iningles. Ang taga Japan, Taiwan ug South Korea maglisod gyud intawon. Ang uban kanila dinhi man gani nag-eskuwela og English language. Unya pinaagi sa K to 12 molambo kaha ang atong edukasyon nga daghan man gihapong mga problema?
(bobby.nalzaro@yahoo.com)