COMPOSTELA VALLEY -- Daghan ang nadismaya sa way klarong desisyon ni Mayor Rodrigo Duterte kung modagan ba pagka-presidente o magpabiling mayor sa siyudad sa Davao.

Si Calixto, pedicab driver sa Dakbayan sa Tagum, misulti sa Sun.Star SuperBalita nga sa sinugdan nalipay siya nga nadungog ang hungihong nga magpapili pagka-presidente si Duterte.

Apan pila na ka bulan ang milabay, nagpabiling istorya lamang ang tanan ug way klarong kamatuoran.

"Atras-abante man ni iyang desisyon, way klaro! Napul-an nako, kung di siya modagan, mosulti diretso. Moingon lagi nga dili pero adunay mga ads nga atong makita sa mga kadalanan.. DUTERTE 2016," pung ni Calixto dihang nahinabi sa SuperBalita samtang nagmaneho sa gipanag-iyahang traysikel.

Gikalibgan sab sa uban ang gihimo ni Duterte nga paglibot-libot sa mga dapit sa nasud diin iyang giduso ang Federalismo nga kung wa siya'y plano nga modagan, nganong iya man mang gihimo ang maong lakang ug gitunong pa gayud nga taliabot ang election.

"Kung wa gayud unta na siyay plano nga modagan, di unta na siya magsuroy-suroy sa lain-laing dapit tungod ana iyang Federalismo, modagan lagi na siya, naghulat lang og timing. Alangan man og char-char lang na iyang gihimo nga migasto man na siya ana og kuwarta sa iyang paglakaw-lakaw," pung sab sa usa ka dispatser sa terminal sa Comval nga dako ang pagtuo nga modagan gyud ang mayor.

Sa milabay'ng mga adlaw, mikatag sa Internet ang bag-ong political advertisement ni Duterte nga nagpakita sa Dakbayan sa Davao kung unsa ka-asenso, kamalinawon, ug giingong mahimong sundugon sa laing lugar.

Apan luyo niini padayon, gihapon ang mayor sa pagbalibad ug mi-ingon nga di gihapon modagan pagka-presidente butang nga gikalibgan sa pipila ka mga yanong lungsuranon kinsa nakapangutana kung "scripted ba kining tanan?!"

"Basin, style ni Duterte ang maong pamaagi sa pagdagan pagka-presidente nga sa sinugdan padili-dili aron ingnon apan sa kinatumyan, mangampanya na para siya iboto," nairitang pung sa usa ka jambolera sa Dakbayan sa Panabo.

"Sayang kung di modagan si Mayor kay sa akong tan-aw angayan man siya nga mahimong sunod nga Presidente apan kung tinuod nga wa siyay gusto nga modagan nganong atong mang pugson, pabilin siya pagka-mayor dinhi's Davao. Diri tang Binay nga nagpanikad nga mahimong Presidente," komentaryo sa usa ka jeepney driver sa dakbayan.

"Di na modagan si Duterte, hadlok na siya, unsaon god pagdaug ana, unsa iya ipanghambog kanang mga adik ug mga snatcher nga gipamatay diri sa Davao?!" laing komentaryo sa usa ka laborer sa dalang Boulevard nga wa magpabutyag sa iyang pangalan.

"Maglibog ta ana niya uy, pero kami sa tinuod lang kung modagan siya pagka-presidente di mi mibotar niya, di nami gusto nga mabalik pa ang kanhi Martial Law nga daw hiniktan sa liog ang mga Pilipino," butyag sa usa ka bana kinsa manindahay sa mga aseras sa siyudad sa Davao.

Naghinaut ang kadaghanan nga unta aduna nay hingpit nga desisyon ang mayor ug di kay magpapaling-paling sa iyang plano hangtud nga mahug na hinuon sa way klaro. (DTV)