ANG bullying kon pagbiay-biay ug ang kakuwang sa mga lawak-saringan ug silya mao'y nag-unang problema sa mga tunghaan sa pagsugat sa unang adlaw sa klase kagahapon.

Gi-ingon nga di na bag-o ang problema sa kakuwang sa mga lawak ug silya diin mosamot pa kini sa pagpatuman sa K to 12 Program karon nga academic year 2015-2016.

Si Agnes F. Tatoy, coordinator sa Special Education (SpeD) sa Bolton Elementary School sa Davao Central District, mi-asoy nga sagad problema gayud ang mga lawak bisan sa iyang gigikanan ng mga tunghaan.

"Mao man gayud na ang nag-unang problema. Sa amoa pod diri, problema sab ang security kay kulang gyud. Usa lang god ang guwardiay, di bastante nga usa lang, di na kapiog og naay mga hitabo labi na sa mga miyembro sa gang ang mosulod sa eskuwelahan," ingon ni Tatoy.

Samtang, si Wilson G. Gamao, principal sa Zonta Elementary School sa Sta. Ana District, misulti nga bullying ang problema nga sagad niyang makita panahon sa pag-abli sa klase.

"Bullying ni diri sa Zonta considering nga naghalu-halo diri ang mga tribu sa Muslim, Bisaya, tapos mahaloan og Badjao," sulti ni Gamao.

Hinuon, sumala sa Davao City Police Office (DCPO), ilang gikatag ang presinsya sa kapulisan sa mga tulunghaan aron luwas ang kabataan nga anaa sa sulod sa mga tunghaan.

"We've scouted all the public schools here in the downtown area earlier this morning. I just told them not to stay in one place but to also man the streets. We deployed personnel in our public assitance desk," sulti ni DCPO Director Vicente Danao atol sa pakighinabi sa SuperBalita. (JPC)