DUNAY punto ang Department of Health (DOH) nga angay usab tukion og maayo niining ilang pagpang-apod-apod og mga syringes (gamit para injection) ngadto sa mga drug users diha sa Barangay Kamagayan, dakbayan sa Sugbo.

Usa niini mao ang pagpakgang sa grabing pagkatap sa sakit nga HIV/Aids ning maong dakbayan.

Ilang gitumbok nga ang pagpuli-puli og gamit sa mga syringes sa mga adik maoy hinungdan sa grabing pagpanakod sa maong sakit.

Ug aron dili na magpuli-puli, matod sa DOH, kinahanglan moapod-apod sila og mga syringes ngadto sa mga drug users.

Dili ba kini makaapekto sa laing programa sa gobiyerno ilabi na ang pagpakgang sa mga tiggamitan sa gidiling drugas?

Kini tungod kay mora man hinuon og nag-encou­rage kini niadtong mga adik nga magpadayon na lang sa ilang illegal nga binuhatan tungod kay aduna na man silay supply nga ilang magamit sa pag-adik-adik.

Salikwaot paminawon nga adunay nga anti-drug crusaders nga nakigkombati aron mahilayo ang mga kabatan-onan sa paggamit sa gidiling drugas apan adunay ahensiya mismo sa gobiyerno nga daw sa nagdasig na hinuon sa mga adik.

Sa niaging semana, ang secretary sa DOH nga si Paulyn Jean Ubial nagkanayon nga bisan pa sa panawagan sa Senado sa pagsuspenso sa pagpang-apod-apod niini.

Ambot og nganong porsigido ug aporado man ki­ning DOH sa pag-implementar ning maong proyekto nga gipahunong na man unta kini sa senado.

Nganong dili man sila maminaw, ug kuhaon ang pikas habig aron masuhid og maayo ug alternatibo kon unsaon pagsulbad ang maong problema nga dili makamugna og laing na usab nga problema?