DAVAO DEL NORTE -- Giangkon sa usa ka principal sa Dakbayan sa Tagum nga kuwang og mga lingkuran ang iyang tunghaan sa unang adlaw sa abri sa klase kagahapon.

Sumala ni Siony German, principal sa Magupo Pilot Imelda Elementary School, kulang og armed chairs ang tunghaan apan duna'y dagkong mga plastic nga lamesa ug mga bangko nga magamit sa dihang nahinabi sa SuperBalita kagahapon.

Apan giklaro ni German nga andam hinuon sila sa kakulang sa mga lingkuranan ug kaya ra nga dumalahon sa eskuwelahan ang tanan nga mga estudyante.

Nasayran nga diskarte sa eskuwelahan ang per session nga pag-eskuwela alang sa Grade 1 ug Grade 2.

"Coming pa pero naay commitment ang local nga panggamhanan nga matagaan ta og armed chair. Huwat lang ta," sulti pa ni German.

Una na nga gi-angkon ni Mayor Allan L. Rellon nga dako pa ang kakulang sa lingkuranan alang sa mga tunghaan sa Dakbayan sa Tagum.

"Una nako manghatag sa sikbit nga mga dapit ug laing eskuwelahan kung maapod ug mauna og tubag ang panginahanglan sa atong siyudad. Charity begins at home," dugang sa mayor.

Wa na mihatag og konkretong ihap sa kakuwangan sa pasilidad sa mga tunghaan ang mayor apan misaad siya nga lukpon og apod ang mga tunghaan sa dakbayan sa ilang mga kinahanglan.

Dunay 40 ka mga tunghaan sa Dakbayan sa Tagum og P500 ka libo ka pesos ang budget ug gigasto alang sa gihimong Brigada Eskwela niadtong milabay nga semana.

Apan sa maong kahimtang, tino nga daghan pa gihapon ang kulang labi na kay midaghan ang populasyon sa matag tuig. (DRP)