KIDAPAWAN CITY -- Usa ka inilang negosyante sa North Cotabato ang andam mohatag og ganting salapi aron dakpon ang aswang nga buhi.
Matod sa usa ka nagpailang Ka Rodel, hasol na kaayo ang gi-ingon nga pagpanghasi sa aswang didto sa probinsiya.
Kasagaran sa mga molupyo sa Aleosan ug Pikit ug mga kasikbit nga lugar, alas 5:00 pa lang sa hapon, anaa na sila sa sulod sa ilang bay sa kahadlok nga mabiktima sa aswang.
Apil nga apektado ang mga negosyante hilabi na kon gabii gumikan wala na'y mamalit sa ilang mga tindahan sa kahadlok sa aswang.
Samtang ang mga mag-uuma sab dili na makasayo og trabaho sa ilang mga uma sa kabalaka nga ilang masugatan ang gi-ingon nga aswang.
Mahinumdoman nga unang gipamahayag ni Barangay Tapodoc Kapitan Khadaffy Taya nga upat ka tawo sa ilang dapit ang gipaak sa aswang og siya mismo nakasaksi sa paglupad niini nga daw manananggal.
Apan daghanan sab ang dili motuo nga ang mga biktima gipaak sa aswang kon di gipahit sa ihalas nga iring o kaha buang nga iro.
Gihagit ni Kapitan Taya kadtong dili motuo nga dunay aswang nga moabot ra ang panahon nga sila motuo niini hilabi na kon sila na ang mabiktima.
Giklaro sab ni Cotabato Board Member Dulia Sultan nga wala'y kamatuoran ang mikatag nga balita nga dunay aswang sa probinsiya gumikan sa pagsusi sa mga doktor.
Sumala pa nga mga samad nga naangkon sa upat ka mga biktima gikan sa mga ihalas nga mananap. (EEF)