ORMOC CITY, Leyte - Mokabat sa 370 ka barangay sa Eastern Visayas ang certified drug free, matod sa kapulisan.

Nasayran nga mas daghan nga barangay sa probinsya sa Leyte ang nadeklarar nga drug free.

Base sa datos, 155 ka barangay ang certified drug free sa Leyte; 31 sa Southern Leyte; 2 sa Biliran; 14 sa Ormoc City; 20 sa Tacloban City; 30 sa Samar; 73 sa Eastern Samar ug 45 sa Northern Samar.

Si P/CInsp. Bella Rentuaya, spokesperson sa Police Regional Office (PRO) 8, misugilon nga miagi sa istriktong proseso ang pagdeklarar og drug free.

“Ibig sabihin po, wala ng pushers, users, walang laboratory at drug den,” pasabot ni Rentuaya.

Ang proseso sa pagdeklarar magsugod sa chief of police sa lugar kinsa moisyu og certification.

I-attest kini sa Barangay Anti Drug Abuse Council (BADAC), ipasa sab ngadto sa Municipal ADAC alang sa kompirmasyon ug resolusyon.

Ang katapusan mao ang Philippine Drug Enforcement Agency (PDEA) nga maoy mo-validate.

Dugang ni Rentuaya nga madugangan pa ang mga barangay nga ideklarang drug free gumikan sa way hunong nila nga operasyon subay sa Project Double Barrel Alpha.

Ang Eastern Visayas adunay 4,390 ka barangay diin 2,474 ang apektado sa ilegal nga drugas.