KAPIN 1,000 ka mga bata ang gidid-an sa pagsulod sa tunghaan human ang opisyal sa Department of Education (DepEd) sa Davao del Norte nagmando nga sirhan ang tunghaan sa mga lumad sa Talaingod, nga gipadaggan sa Salugpungan Ta 'Tanu Igkanugon Community Learning Center (STTICLC).
Ang pagsira sa tunghaan gi-rekomenda ni Davao del Norte Schools Division Superintendent Josephine Fadul.
Sa iyang suwat niadtong Mayo 12 ngadto ni DepEd-Davao Director Alberto Escobarte, si Fadul misulti nga ang temporaryong pagsira sa tunghaan gipaluyohan sa Talaingod Tribal Council of Elders.
“Daghang estudyante ang wala pa naka-enroll sa probinsiya tungod lang sa order na ipasirado tanan nga mga eskwelahan na gituohan nila na naga suporta sa communist movement. Naa pay hulga nga dili na gyud maka-eskwela ang mga lumad kay isirado gyud for good ning mga eskwelahana,” sulti ni Ruis Valle, spokesperson sa Save Our Schools (SOS) Network kagahapon.
Usa ka grade six nga si Jinky Malibato sa MISFI Academy mipadayag sa iyang kaguol labot sa maong isyu.
Nabalaka siya nga di siya makagraduwar sa elementarya tungod sa pagsira sa ilang tunghaan.
“Nanghinaot mi nga makapadayon mi og eskwela karong tuiga,” sulti ni Malibato.
Si Ronie Garcia, admin officer sa STTICLC, misulti nga ang mga magtutudlo sa learning center nagkwestiyon sa mando nga gihimo sa opisyal sa DepEd.
Dugang niya nga ang mga staff sa learning center dunay katungod nga masayud ug konsultahon sa DepEd alang sa kaayuhan sa mga bata sa komunidad.