ADUNAY itsa sa gawas ug abtik ang naa sa alimpatakan ni national coach Chot Reyes kabahin sa pro­seso nga iyang pagasubayon sa pag­pili og mga magduduwa nga mo­langkob alang sa Gilas Pilipinas 5.0.

Giangkon ni Reyes nga adunay dili mausab sa iyang paghibalik isip national men’s basketball head coach apan iyang giklaro nga dako ang kausaban kabahin sa pagpili og mga magduduwa kumpara niadtong 2014 sa katapusan niyang paggiya sa Gilas.

Gipasabot ni Reyes, five-time Coach of the Year sa Philippine Basketball Association (PBA), nga sama sa iyang naandan, mas mogamit siya og gagmay apan abtik nga line-up aron iparang sa mga higante sa ubang nasod nga ilang masangka sa umaabot nga nagkadaiyang international events.

“There has to be some changes, but essentially we’re going to be a ‘small ball’ playing team,” batbat ni Reyes sa interbyu sa Spin.ph. “Dribble drive is still best, and most suited, system for a Philippine team. Tayo naman ang nagpa-uso n’yang (small ball), nagsunuran na lang ang mga iba.”

Wala mohatag og mga pangalan si Reyes apan daw nalantawan sa Spin.Ph nga haom sa iyang gipangita sila si Terrence Romeo sa GlobalPort Batang Pier, Jasyon Castro sa Talk N’ Text KaTropa, Paul Lee sa Star Hotshots, Japeth Aguilar sa Brgy. Ginebra Gin Kings lakip na si JuneMar Fajardo sa San Miguel Beermen.

Ang labing unang lakang nga pagahimuon ni Reyes mao ang pagtudlo sa mga magduduwa nga iyang ilakip sa national training pool nga maoy basihan sa pagpili sa final 12.

Apan gumikan sa pagkalangan sa pag-anunsyo sa eskdyul sa umaabot nga Seaba tournament, nga maoy qualifying event alang sa Fiba Asia championships, naguba ang eskedyul sa Gilas.

Ang eskedyul sa ubang mga torneyo nga salmutan sa Gilas 5.0 nahan-ay na gawas lang sa Seaba. Ang Fiba Asia karong Agusto 15-27 samtang ang World Cuop qualifiers karong Nobiyembre.

Gipasabot ni Reyes nga makig­hugpong pa siya sa iyang coaching staffs ug gikinahanglan nga makapili na sila og mga magduduwa nga masulod sa national training pool sa dili pa mahuman ang kasamtangang buwan.

“Hindi ko pag masyado pinagiisipan,” tubag ni Reyes sa dihang gipangutana kabahin sa iyang pagapilion nga mga magduduwa. “I still have to sit down with the coaches.”

Hinuon gipasabot ni Reyes nga ang pagkausab sa Fiba Asia zone diin mahilakip na ang world power Australia ug New Zealand ug ang taas nga programa alang sa pag-qualify sa Olympics maka-impluwensiya og dako sa iyang pagpili og mga magduduwa.

Gipasabot niya nga posibleng pipila na lang ang makabalik sa iyang gipormang puwersa nga nakabaton og silver medal sa FIBA Asia niadtong 2013 sa Manila.

Sa plano ni Reyes, kinahanglan nga ang mga magduduwa nga iyang mapili makakombati pa og insakto sa tuig 2019 atol sa World Cup sa China.

“Remember, we’re preparing for three years down the line. The goal is to be the best-placed Asian team in 2019 (World Cup), because we want to go to the Olympics,” pasabot ni Reyes.

“Ganoon pa rin, we should be fast, play run and gun, shoot a lot of threes. So we need players who are versatile, can play multiple positions, and can run. Kaya nga andyan ang mga cadets eh.”

Nidugang si Reyes nga kanu­nay siyang motan-aw og mga duwa sa PBA aron makakuha og ideya kon kinsa ang angayan niyang pilion nga mga magduduwa alang sa sestima nga iyang ipatuman sa sunod nga puwersa sa Gilas Pilipinas.