SOBRA 80 ka mga pamilya nga apektado sa sunog nga miigo sa Sitio Salvacion, Brgy. Maguikay, dakbayan sa Mandaue ang makigtagbo sa tag-iya sa luna aron mohangyo nga lugwayan una ang panahon usa sila mapahawa sa dapit nasunugan.

Ang panagtagbo gikatakdang karong Lunes sa buntag, sumala pa ni Bise Mayor Carlo Fortuna sa dihang nahinabi sa mga tigbalita kagahapon.

Matod ni Fortuna nga kini maoy nasabutan sa mga apektadong pamilya sa ilang panagtagbo tali sa representante sa Limkimso Corporation niadtong Huwebes sa hapon.

Duha ka mga representante sa duha ka mga lot owners ang nitambong sa kalihukan.

Laing tag-iya sa luna mao ang usa ka Mr. Uy, sumala pa ni Fortuna.

Matod ni Fortuna nga sobra na sa 10 ka mga tuig ang pagpuyo sa kapin sa 80 ka mga pamilya ubos sa luna sa Limkimso bisan napilde na sa injectment case sa korte niadtong 2006.

“In fact they lost the injectment case in 2006, so they’ve been staying there for more than 10 years despite the order for  them to vacate,” ni Fortuna.

Dugang sa bise mayor nga atol sa meeting, wa hinuon nagmagahi ang mga residente sa paghawa sa maong dapit ug sila mapasalamaton sa Limkimso sa ilang pagpuyo sa luna nga way gasto sud sa katuigan.

“We found out that there are only 10 fire victims who are staying on the lot of Mr Uy and then these fire victims were actually being sued by Mr Uy over an injectment case. And there was an agreement signed, the compromise agreement provided that they were supposed to leave the lot of Mr Uy of April this year ,” sumala pa sa bise mayor.

Paambit ni Fortuna nga gihatagan usab ni Mr. Uy ang apektadong mga residente sa sunog og tag P2,500 matag pamilya.

Ang mga nasunugang residente ubos sa luna sa Limkimso ug ni Mr Uy parehong buot makigtagbo sa mga tag-iya sa luna aron masabutan ang lugway sa panahon usa sila mohawa sa dapit.

Sa meeting, nipada­yag usab ang mga residente og interes nga paliton ang luna nga gitukuran sa ilang mga balay apan si Fortuna nagkanayon nga ang pagpalit depende kon mosugot ang mga tag-iya sa luna.